الأسباب الحقيقية لتوقف انتخابات البرلمان
سما المصري، حمدي الوزير، مصطفى كامل، شاهيناز النجار، أحمد عز، طب وبعدين؟ عملنا ثورتين، وشيلنا رئيسين، وناس ماتت، علشان دول اللي يبقو في البرلمان؟!
مش بنقلل من شأن حد، بس إديلي عقلك وامشي حافي، ده حتى مجلس النواب اتغير اسمه وبقى مجلس النواب، طيب عاوز أسأل على حاجة، الأستاذ مصطفى كامل قال للأستاذة سما المصري في مداخلة هاتفية في أحد البرامج اللي استضافتها، إنه ميشرفهوش إنها تكون معاه في البرلمان... مش هنقوله إن البرلمان مش باقي ورثه علشان يختار مين يدخل معاه أو لا، لكن لو حضرتك يا أستاذ مصطفى اتفقت إنك تغني في فرح حد مشهور والأستاذة سما كانت في الفقرة اللي بعد منك على طول، هل حضرتك هتقول إنه ميشرفكش إنها تبقى موجودة؟ ولا أكل العيش هيحكم؟
يا أستاذة سما، لو عملتي استجواب لأحد الأعضاء واترفض، هتغني "أحمد الشبشب ضاع" ولا هتعملي إيه؟!
لو هو ده البرلمان اللي هيتصرف عليه ملايين من دم المصريين يبقى مش عاوزينه، أنا مش هتكلم عن حيثيات حكم، ولا هتكلم عن قانونية الانتخابات، ولا هتكلم عن شاهيناز النجار ولا عز ولا غيرهم من الناس اللي منعرفهمش لسه، بس أتمنى إنه يوم ما تتعمل انتخابات برلمان في بلد قامت فيها ثورتين على مدى 4 سنين يبقى اللي هيترشحو يكون كل همهم الناس مش مصلحتهم، لما تبقى عندنا الثقافة دي ساعتها بس نقول أهلا بالانتخابات.
