تعليقات نشطاء "تويتر" علي ارتفاع أسعار السجائر.. رأفت:"ياللي ساكت ساكت ليه ناوي تبطل ولا إيه".. مسعود :"مش هنسلم مش هنبيع مش هانسيب التبغ يضيع"..تواب:"التخميس هو الحل"..لاشين :"هاخد سيلفي مع السيجارة"

سادت حالة من الثورة الساخرة نشطاء موقع "تويتر" بعد قرار الحكومة رفع أسعار السجائر المحلية والمستوردة.

ودشن نشطاء "تويتر" هاشتاج ساخرا بعنوان "ثورة المدخنين"، وآخر بعنوان "ثورة النيكوتين".

وقالت "الملكة بلقيس": "بعد زيارة الضرائب على السجائر.. انتظروا ثورة الكيف.. ثورة المدخنين".

وأضاف إسلام أشرف: "ثورة على شبكات المحمول مصر.. ثورة المدخنين.. تعالوا جنب هاشتاج.. ثورة الإنترنت.. بلا كلام فارغ ثوار الكيبورد".

وعلق "هوسس ": "أهم اللي بيشربوا سجاير لو عملوا ثورة دللوقتي هايطلعلهم جماعة اسمها الدخان المسلمين ويشربوها.. نحس ادعوا لمصر".

ثورة المدخنين
وقال حساب "أوشو مو رأفت": "ثورة المدخنين.. ياللي ساكت ساكت ليه ناوي تبطل ولا إيه".

وقال محمود على: " طول ما الشعب المصري منهوب من حكومة معندهاش أي حاجة في أي حاجة تبقي لازم تكون فعلا فيه ثورة المدخنين".

وأضاف عمر عبد العزيز: "يا ماما مش بحبه = يا هبلة ده بيشرب lm ده هيعيشك عيشة مرتاحة ثورة المدخنين".

وقال كريم الويشي: "أنا اشتريت علبة أحمر بـ 25 جنيها ليه شغال حرامى ثورة المدخنين.. ثورة الخرمانين.. ثورة السجائر أنا أبويا زمان قالى كيف الـ... يشتريلها معلقة دهب بس مش كده يا جدعان 25 جنيها كتير".

وأضاف محرم صادق: "فرضت ضرايب تصاعدية على الداخل؟ لأ! طب فرضت ضرايب على الثروة؟ لأ! أومال عملت إيه؟ فرضت ضرايب على السجاير.. ثورة المدخنين".

"أعقاب السجائر"
وتابع حسين غيث: "اتجاه معظم الشعب للبحث في الشوارع على أعقاب السجائر ثورة المدخنين".

وقال "فارس المعجزة": "فين أيام ما كان صاحبك يقولك ماتجيب سيجارة تطلع العلبة كلها تحطها ادامه.. دلوقت بالجزمة ثورة المدخنين".

وأضاف عبد الله محمود زاهر: "ودلوقتي داعش ممكن تجند أي شاب مصرى بعلبة سجاير سوبر.. ثورة المدخنين.. هنضم لداعش".

وتابع فارس مسعود: "مش هنسلم مش هنبيع مش هانسيب التبغ يضيع ثورة المدخنين.. صباحكم سوبر وفيسروى وlm".

وأضاف كريم رحيم: "أنا من الجيل اللي شرب المارلبورو بـ 3 جنيهات وستين قرشا"، وقال "فارس مسعود": "دى كانت أيام التدخين الجميل"، وتابع "تواب": "التخميس هو الحل.. ثورة المدخنين".

وعلق "حاتم إيجي": "هو اه سعر السجاير زاد.. بس أحب أفكركم.. الحشيش ثابت على موقفه ثورة المدخنين.. ثورة النيكوتين".

ثورة النيكوتين
وأضاف سيد النواوي: "رسيت في الآخر على كليوباترا.. ثورة المدخنين.. ثورة النيكوتين".

حمادو الدبلوماسي "معاك مهر البنت يابني - لأ ياحج - بس أنا معايا 3 علب سجاير - مبروك عليك يابني.. ثورة المدخنين غاز وغلي كهربا وبتقطع...يا بلد".

وقال محمد خالد: "البشوات دلوقت يا بيلبسوا جواكت جلد - يا بيشربوا ميرت.. ثورة المدخنين ثورة الخرمانين".

وأضاف محمد بن حسني: "عليا الطلاق لمبطل سجاير.. ثورة المدخنين"، وتابع محمد لاشين: "قريبا.. تعالا ناخد سيلفى بالسجارة ثورة المدخنين.. - هات سجارة = استنى نولع واحدة ونخمس".