«أبوك السقا مات».. شعر سالم الشهبانى

أبوك السقا مات
يا شاعر الثورات
يا مفجر الثورة
من أفخم الأوتيلات
يا صاحب الأبيات
اللى بتضوى لهيب
يا مفرقع الأنابيب
عارفك عدو وحبيب
والطفل فى الأنابيب
بيردد الأبيات
أبوك السقا مات
مشهور يا ناس مشهور
مِ القمقم المسحور
بيطَلَّع المنشور
وبيطلب الطلبات
أبوك السقا مات
لا وقفت يوم فى طابور
ولا كنت يوم معزور
ولا قالك المأمور
يا ابن اللى أبصر كات
أبوك السقا مات
يا دودو يا متدلع
يا حلو يا شياكة
بتحارب العسكرى
بالفتلة والسلاكة
تصرخ فى وشه تثور
تقوله كبة وكاكا
إدى النضال يا خلق
لا كدب لا شعارات
أبوك السقا مات
على كل لون
يا باطيسطا
الحالة تبقى ألِسطا
والعيشة من غير واسطة
زى الجروب بلا شات
أبوك السقا مات
بينكر الماضى
ويقول أنا عصامى
بدأت أحلامى
من فيلا فى الكيت كات
أبوك السقا مات
يا دودو يا شياكة
يا حلو يا ملزق
الحق مهما غاب
مسيرو هيخزّق
الكدب والشعارات
أبوك السقا مات
ومصر بنت الإيه
العشوائية البيئة
هتلم أولادها
فى الحجر مِ الضيقة
وتحاجى على طيرها
مِ الريح ومِ الأزمات