أبين زين وأضرب الودع

أبين زين.. وأقول على المستخبى واللى مش معروف.. أضرب في ودعى.. وتملى بدعى.. والمستخبى بقوله ع المكشوف.

أقول لمين.. وأعيد لمين.. خلى بالك فيه كمين.. من جماعة ممنوعين.. بص شوف مين في الشمال.. بص شوف مين في اليمين.. اللى خارج عن قانونك.. كلهم ناس معروفين.. والبلد فيها الغلابة والعباد الطيبين.. اللى عايشين من عرقهم.. وبحلالهم مبسوطين.. بس فيه ناس تانية يا بني.. في الكراسى طمعانين.. كل يوم عاملين مظاهرة.. في الشوارع مدسوسين.. قلنا مرة اتنين تلاثة.. مصر فيها مؤمنين.. بالعمل والإنسانية بين صفوفنا معروفين.. نفسهم يبنوا حضارة.. بين نصارى ومسلمين.. يبقى ليه نقفل طريقهم.. وإحنا ليهم محتاجين.. فاسمعوا منى النصيحة وافهموا يا مخدوعين.. ربنا يستر طريقنا.. طول ما فيه ناس مؤمنين.. بالعمل علشان يعيشوا.. طول حياتهم مبسوطين.. إحنا مش ناقصين مشاكل.. مصر فيها مجروحين.. وافهمونى مرة واحدة.. ياللى ناصبين الكمين.. كل ظالم له نهاية مهما طال عمر السنين.. والشعوب الحرة دايما فيها ناسها المخلصين.. والتاريخ فيه كل حاجة وانتوا دايما مدركين.. إن فيه من جشعهم.. في اقتصادنا طمعانين.. بس جيشنا وشرطة واقفة.. في الميدان ومفتحين.. مستحيل نقبل تحدى من عناصر غدارين.. نفسهم نمشى بطريقهم وإحنا جهلة مكبلين.. والحقيقة مصر فيها شعب ناسه مجربين.. واسألوا عنهم تاريخهم.. تعرفوا الشعب الأمين.. والزمن شايف وعارف اللى خاين والأمين.. هي كلمة واحدة منى الخداع ما لوش عينين.. والبلد عرفت طريقها.. رغم أنف الشمتانين.. والجميع عارف وفاهم إحنا مين.