أبين زين واضرب الودع
أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى بقوله ع المكشوف
اصبر يا مصرى على طيش الحقود كله.. وقول لنا الحق فين وكيف حنوصل له.. واصبر يا صابر وقول اللغز إيه حله..
فسر لنا المشكلة واشرح لنا كله.. عن كل واحد طغى خان العهود قول له.. راح ييجى يوم ينكشف.. والباغى نوصل له..
واللى أخذ حقنا في لحظة حنذلُه.. فيه شعب واعى وربك ع الفساد دلُه.. وكشف ألاعيب تحاك.. من كنت تأمن له..
فاسمع كلامى ونصيحتى المعتدى شلُه.. وارفض كلام اللى عايزك تحت تنزل له.. وقول أنا عرفت كل اللى إنت بتميل له..
لكن من المستحيل راح أكون في يوم خلُه.. ولا عمر فكرى بذكاء غدرك حتوصل لُه.. وكل واحد وغاوى حوار أحلل له..
إحنا هنا شعب مصر الحر في محلُه.. في ساعة الجد يضرب اللى يحتلُه.. وينسفه لو يفكر مرة يغزل له.. شباك خديعة عشان لشبابه يقتل له.. وفى الشوارع يشعلل نار ويسحل له.. لكن بقى الحق بان وعرفت أوصل له.. بفكر واعى وإيمان ناس بيتولوا.. كل الأمور ولعظيم العرش بيصلوا.. ولشعبهم مخلصين ولا عمرهم ضلوا.. ومهما أقول واللا أعيد ما يوم حيختلوا..
دا شعب مصر الأصيله تاريخه بيدلُه.. على صاحب الكلمة والمبدأ هنا كلُه.. ومن أراد الحقيقة إحنا حتقول له.. الحق حيبان في يوم والباغى حنذلُه.
