بالصور..أطرف إجابات الفتيات على "عريسى المجهول أحب أقولك؟".. نادية:"إتقاللى ياعانس وبقيت عالة على البيت".. ريهام: "اهرب".. مى:"عوقت ليه وغووشتنى".. وإيمان: "السكر والضغط نحلوا وبرى"
تحلم كل فتاة بفتى أحلامها الذي سيأتى على حصان أبيض ليخطفها إلى دنيا الأحلام، ويحقق لها أمنياتها التي ادخرتها خصيصا لهذا اليوم.
وطرحت إحدى صفحات موقع التواصل الإجتماعى "فيس بوك" سؤالا تحت عنوان "عريسى المجهول أحب أقولك......؟ " لتنهمر إجابات الفتيات الطريفة والساخرة.
اتهزقت من طوب الأرض
كتبت نادية "تعالى عشان اتهزقت من طوب الأرض بسببك، واتقاللى يا عانس أكتر من عدد سكان قطر وبقيت عالة على البيت"، وأضافت منى "هتيجى بالذوق يا ابن المبقعة ولا آجى أجيبك من شعرك".
وعلقت بسمة بتلك الكلمات:"طلقنى عشان أنا بردانة هتقولى ليه؟ هقولك.. هتقولى قومى أعملى أكل هقولك بردانة، هتقولى نخرج هقولك بردانة، هتقولى أنتى طالق، وأنا محدش يطلقنى أنا أتطلق براحتى".
اهرب
وعلقت سميرة أيضا قائلة: "خليك راجل كويس كده ابن ناس ومتفاهم، عشان شكلى هموت قبل ما أشوف راجل بجد"، كما أضافت ريهام كلمة واحدة:" اهرب"، وتبعتها رشا قائلة:"انجز عشان الأكل على النار وماتقوليش سخنيه تانى".
"هتشوف أيام سودة"
كما وجهت "زقزوقة" عدة تساؤلات لعريسها المجهول قائلة "انت فين يا قلب مراتك؟ مجيتش ليه لحد دلوقتى؟ تايه؟ مشلول؟ انطق وكلمنى زى ما بكلمك مجيتش ليه؟ عاجبك شكلى وسط صحابى وانا مقضياها مبروك مبروك وعمالة أسقف زى كلب البحر؟ اتلحلح شوية أحسن ودينى انت حر بقى".
أضافت مى:"إنت فين يا أخى عوقت ليه وغووشتنى عليك"، أما نورا فكتبت:" متجيش دلوقتى عشان أنا مش جاهزة".
وعلقت إيمان قائلة "السكر والضغط ناحلين وبرى انجز"، أما سهيلة فقالت: "هتشوف أيام سودة يا كبير عشان سايبنى لوحدى كل ده".
