رفع الحد الأدنى للإعفاء الضريبى إلى 12.000
أخيرا !! وجدنا شيئا حسنا نكتب عنه، هنتكلم عن إنجازات وقرارات مهمة لصالح المواطن، بجد مللنا النقد والاجتراء على الحكومة ونفسنا نشوف إيجابيات وليس سلبيات.. وقد قررت الحكومة رفع الحد الأدنى للإعفاء الضريبى إلى 12.000 قلنا "خير اللهم اجعله خير".. هنبدأ أهو نسمع أخبار يمكن تكون حلوة، ولعلى وعسى حكومة الإخوان تكون خلاص هتحس بالشعب شوية وتساعد على رفع معاناته، وخاصة بعد أن كان الحد الأدنى للإعفاء الضريبى 9.000 جنيه فى عهد المخلوع.
يعنى ببساطة "إن أى مواطن دخله الشهرى 1000 هيدفع ضرايب للحكومة، قلنا تمام مافيش مانع وهللنا وقلنا الله أكبر ياسلام على الحكومة وإحساسها العالى بالمواطن.. وفجأة جاء إلينا أحد الخونة المأجورين من الفلول، قالنا ياناس ده مشروع القرار ده كان قديما والحكومات الأخيرة ماوافقتش تطبقه لأن فيه ظلما للمواطن، وأوضح لنا أن الحد الأدنى كان 9.000 جنيه فى 2005، وأن التضخم من 2005 وحتى الآن بحساب دقيق لو أن الحكومة الحالية حافظت فقط على نسبة الـــ 9.000 ، وأضافت عليها نسبة التضخم لأصبح المبلغ 20.000 كحد أدنى للإعفاء الضريبى، وده لو فقط حافظنا على معدل الــــ 9.000 ج منذ 2005 بإضافة نسبة التضخم لهذا المبلغ.
وعلمنا أن المواطن الغلبان اللى له 8 سنين بيطالب بأن يكون الحد الأدنى لأجره 1200 ج شهريا.. أخيرا الحكومة هتنصفه وتاخد منه ضريبة لو دخله الشهرى أصبح 1000.
طب مش مشكلة.. قلنا الحكومة مزنوقة وعايزة أى مبالغ أهو المواطن الغلبان يساعد الحكومة برضه أحسن من تأجير ابو الهول والأهرامات، بس على الأقل الغلبان يكفى نفسه كفرد والباقى يدفعه ضريبة.
ومن هنا طالب المواطن الغلبان بضرورة تدخل أى مسئول عبقرى اقتصاد وميزانيات يحسب له الحسبة علشان الــ 1000 يكفيه شهريا وكمان يدفع منه ضريبة، وحتى الآن المواطن ينتظر الرد من الحكومة لعلها تجيب!!!.
ملحوظة مهمة الكلام كله على المواطن اللى لاقى فرصة عمل بـــ 1000 جنيه، الناس الذين دخلهم أقل أو بدون دخل أصلا خارج الحسبة.. بس ياريت المسئول الذى يقدم الحل يجرب يعيش هو سعادته بالألف جنيه شهريا، ويدفع منها ضريبة، علشان يكون مثلا وقدوة، وبعد كده أى فلول أو مأجور يخرس خالص ومايتكلمش.
