بالفيديو.. إزالة الأشجار والزهور من حي المقطم بعد انتهاء زيارة «محلب»

تداول مستخدمو مواقع التواصل الاجتماعي فيديو يظهر إزالة الزهور والأشجار الموضوعة من قبل حي المقطم لتزيين الطريق أثناء زيارة المهندس إبراهيم محلب، رئيس الوزراء، للحي.

فبمجرد انصراف الموكب الخاص بمحلب تم إزالة الزهور، في مشهد أعاد للأذهان فيلم "الوزير جاي" الذي أنتج في الثمانينيات، وتناول بشكل ساخر ما يحدث أثناء زيارات الوزراء من مظاهر كاذبة ومحاولة التجمل وإخفاء سلبيات الواقع.

ولاقى الفيديو ردود أفعال متباينة من مشاهديه، كتبت هند السجيني "ده الحال من قديم الأزل.. وهم المسؤولين نفسهم بيبقوا عارفين.. وإحنا كمان بنبقى عارفين.. وهما عارفين إننا عارفين.. وإحنا عارفين إنهما عارفين إننا عارفين.. فمافيش فضايح ولا حاجة... كبر دماغك".

وكتب هشام فهمي: "ده لو طالوا يرجعوا الزبالة اللى شالوها حيعملوا كده"..

وأضافت سلوى عرفة: "المشهد ده موجود في مصر من سنة 1952 بنفس التفاصيل من غير أي اندهاش والى آخر الزمان". 

واستطرد أميرة سالم: "فضيحة إزاي معلش الحركة دي إتعمل عليها فيلم في الثمانينيات.. راجع فيلم الوزير جاي".

وأشارت إيمان فاروق إلى أن: "دي عهده وتلاقيه رايح يحطها في مكان تاني هيعدي عليه حد من علية القوم".

وقال محمد البنداري: "سرقة الزرع دة من الأهالي إحنا كشعب بردة عيزين ننظف كتير".

وردت منى سالم: "حتى لو الشعب إللى سرقه.. فده معناه إنه مكانش موجود قبل الزيارة.. يبقى ليه يحطوه من الأساس.. كفايانا كدب وتضليل بقى".