ردود فعل غاضبة من تصريح وزير النقل برفع قيمة تذكرة المترو.. مارينا: إدي الناس فلوس الأول.. علي: مش لاقيين نتجوز.. عبد الرحمن: مش هركب مترو.. حسنة: حرام.. منال: المرتب هيكفي ايه.. إبراهيم: بصوا للغلابة

أثارت تصريحات المهندس هاني ضاحي وزير النقل بشأن رفع قيمة أسعار تذكرة مترو الأنفاق، حفيظة الشارع المصري، حيث قال وزير النقل إن السعر العادل للتذكرة هو 25 جنيها، آخذين في الاعتبار مصاريف الأنفاق والصيانة.

خسائر
وكان "ضاحي" قد قال خلال مؤتمر صحفي إن مرافق المترو تعرضت العام الماضي لخسائر وصلت إلى 132 مليون جنيه والعام الحالي إلي 180 مليون جنيه، مضيفا أنه من الضروري رفع سعر التذكرة للتغلب على حجم الخسائر، وإيجاد موارد للإنفاق علي الخطوط الجديدة.

ورصدت عدسة "فيتو" ردود فعل بعض المواطنين علي تصريحات الحكومة برفع قيمة أسعار تذاكر المترو.

الغلابة هيعملوا إيه
أعربت "مارينا خليل" عن استيائها من تصريحات وزير النقل، قائلة: "ما اشتري عربية أحسن ولا طيارة أو يشتري هو مترو ويأجره"، متسائلة: "25 جنيها ده العدل؟!، والناس الغلابة هتعمل إيه؟ قبل ما يغلي الحاجة يدى الناس فلوس الأول وبعدين يغلي عليهم، وسلملي على وزير النقل".

الشباب مش لاقي يتجوز
وقال "علي جمال": "العدل يعملوا تذكرة المترو بـ 25 جنيها لو مرتبنا 25 ألف جنيه، إنما دلوقتى الشباب ماعهوش فلوس يتجوز حتي"، مضيفا: "يا وزير النقل خلي التذكرة بـجنيه زي ماهى عشان في ناس الجنيه عندها ده كتير".

مش هنركب مترو
وتساءل "عبد الرحمن" قائلا: "هو مرتبي كام عشان أركب المترو بـ25 جنيها، دا أنا أخدها مشي أحسن"، وتابع: "لو غليت التذكرة محدش هيركب المترو".

حرام .. كفاية
بينما قالت "حسنة محمد": "حرام الشعب غلبان، كفاية إن التذكرة بجنيه وفي ناس مش بتقدر تدفع الجنيه ده"، مؤكدة أنه يجب على وزير النقل أن يراعي أحوال فقراء الشعب المصري.

المرتب هيكفي إيه ولا إيه
وأكدت "منال" وهى عاملة ببنك الدم: "أنا عاملة مرتبي 350 جنيها بقالى 10 سنوات، بركب يوميا مواصلات بـ5 جنيه، لو غليت التذكرة المرتب هايكفي إيه".

فقـر
وشدد "محمد جمال" علي ضرورة أن يلتفت المسئولون إلي أحوال الشعب المصري قبل اتخاذ قرارات زيادة أسعار تذاكر المترو، قائلا: "لو العدل التذكرة تبقي بـ25 جنيها يبقا لازم مرتباتنا تبقي بالآلاف"، مشيرا إلي أن العدل يقتضي أن زيادة أسعار التذكرة تتناسب مع زيادة المرتبات، مضيفا: "الدولة بتدينى مرتب قد إيه عشان تاخد ضرايب عليه، ماتفكرش في اللى ليك وتنسي اللى عليك".

مش هنركب مترو
وعلق "إسلام المنسي" قائلا إن أكثر من 3 ملايين مواطن يستخدمون المترو يوميا، وإذا زادت تذكرة المترو بشكل مبالغ سيمتنع المواطنون عن ارتياد المترو مما سيتسبب في زيادة الخسائر.

بصوا للغلابة
وأضاف "إبراهيم محمد": "بطلب من وزير النقل أن يكون فيه عدل ويبص للناس الغلابة لأن دول هما إللى بيركبوا المترو".