لدواعٍٍ أمنية!!

باسم كابو مستغربًا: إيه يا عم حيلك.. حيلك.. ثورى إيه وفكرى مين يا جدع ! انت شكلك عملت دماغ معسل وهاتغيب علينا بقى ؟!! عليا النعمة دا أغبى فيلم شوفته في حياتي... يعنى إيه جماعة مخاليل حاجزين جماعة تانيين أجن منهم في متاهة ليها أسوار عالية وبيعاملوهم زى البهايم، وكل شهر يبعتوا لهم واحد جديد يتحبس معاهم وشوية أكل وشرب، لا المبعوت عارف هو اتبعت ليه ؟! ولا هم عارفين هو جاى عندهم ليه وهايستفيدوا منه إزاى ؟ وكلهم ذاكرتهم بلح وممسوحة بأستيكة وفين.. وفين.. بعد مدة على بال ما يفتكروا أساميهم، والناس التانيين سايبنهم كأنهم في العصر الحجرى شوية يزرعوا أكلهم بأيديهم وشوية ياكلوا ورق الشجر على بال ما الزرع يطلع، ولما البرد ياكل جتتهم يبنوا لهم بيت فوق الشجرة زى طرزان ؟!! دا فيلم كله عالم مجانين يا عم.. وخسارة فيه العشرين جنيه اللى دفعتهم عشان أشوفه..

تيفا ماهر غاضبًا: تصدق إنت قفلتني.. يووووه... دا أنا نسيت صحيح إنك أسوأ واحد في العالم يشوف أفلام أو يحكيها فاكر فيلم “speed” اللى كان مكسر الدنيا في التسعينيات وانت شوفته لوحدك وأقول لك الفيلم بيحكى عن إيه يا باسم ؟! تقولى دا فيلم خنيق.. إيه يعنى المعجزة لما أتوبيس يخش في طيارة.. يا مفتري.. بقى الفيلم كله كان بيتكلم عن أتوبيس دخل في طيارة !!

باسم كابو محرجًا: يا ساتر يا جدع دا انت قلبك أسود قوي.. ما كانش حتة فيلم فاشل في التسعينيات، ومع ذلك أنا مازلت مُصرًا على رأيى إن الفيلم اللى إحنا لسه شايفينه ده أغبى فيلم شوفته في حياتي..

تيفا ماهر مستاء بشدة: لا.. لا.. دا أنا كنت فاكرك أنصح من كده بكتير يا كابو.. إخص عليك خيبت ظنى فيك.. يا خسارة أملى اللى حطيته عليك.. يا خسارة الثورة والثوار في كل العصور... يا خسارتك يا بلد..

باسم كابو وقد تشعلق حاجباه بسقف جبهته علامة على الاندهاش الكامل: إيه يا عم انت بتكلم عرابى ولا سعد زغلول؟!! عليّ النعمة أنا عارف إنك لاسع ومخك مسافر من زمان وماشى معاك بس عشان أبوك وأمك موصينى عليك مش أكتر.. وبعدين ما تنورنا يا عم جيفارا وتبطل تنظير ونفخ معسل في وشى لحسن قربت اتعمي..

تيفا ماهر شارحًا وجهة نظره العبقرية في الفيلم: بص يا سيدى الناس الغلابة الموجودين في المتاهة بياكلوا ويشربوا زى البهايم ومش عارفين هم هناك ليه، ولا بيعملوا إيه، ولا اللى جاى مين، ولا اللى رايح فين، وإيه مستقبلهم في البيئة المصمتة دى همّ.. إحنا.. أنا وانت وكل ناس البلد الغلابة اللى عايشين فيها يوم بيومه ولو بطلوا يشتغلوا أو كسلوا في أحد الأيام.. يموتوا من الجوع ولا يلاقوش حد يسأل في اللى جابوهم..

باسم كابو وقد بدأ عقله يسرح فيما يقوله صديقه ويقلبه جيدًا في رأسه: يا سلام !! شوف إزاي.. طيب والعالم ولاد اللذينة اللى باعتنهم هناك وعمالين يراقبوهم ليل ونهار عبر الشاشات ومبسوطين بعذابهم وحيرتهم دول يطلعوا مين ؟!!

تيفا ماهر مسترسلا: ودى عايزة فقاقة افهمها انت بقى..

باسم كابو وقد استنار عقله: يابن الإيه يا تيفا... تصدق صح... يا ولاد الكلب !!.. طيب ووحوش “الجرافر” اللى مانعينهم يخشوا المتاهة ويفهموها ويخلصوها ولابدين لهم جوه أسوار المتاهة واللى يتأخر بالليل أو يحاول يعدى الحد المسموح ياكلوه أو يخلصوا عليه ؟!!

تيفا ماهر شارحًا باستفاضة: دول الأمنجية والمخبرين اللى موظفينهم العالم التانيين عشان الناس الغلابة تفضل غلابة، وحتى الواد اللى عاملينه ريس الغلابة وبيحافظ عليهم منقيينه أغبى واحد فيهم، ولما الواد الذكى فهم الفولة وحاول يفهمها لشعب المتاهة الغلبان اتهموه بالخيانة والعمالة وإن المصايب ما ابتدتش تتحدف عليهم غير من ساعة ما شافوا وشه المشؤوم، وذلك لأن العالم ولاد اللذينة بيراقبوا المتاهة عبر الشاشات والميكروفونات ليل ونهار قوم خلوا “الجرافر” يتجرأوا عليهم ويخشوا عليهم متاهتهم وأرضهم الطيبة الآمنة بالليل وهمّ نايمين ويطيحوا فيهم قتل وضرب عشان يؤكدوا نظرية الواد الغبى اللى عاملينه ريسهم والناس الغلابة يموت في نفوسها الأمل ويبطلوا تفكير ويفضلوا طول عمرهم بهايم وعبيد يحكموهم الأسياد بالريموت كنترول..

باسم كابو مقاطعًا: بس شعب المتاهة عمل ثورة وخلص من المتاهة المصطنعة وقدر يوصل للمختبر والشاشات اللى كانوا بيراقبوهم منها.

تيفا ماهر مؤيدًا: كلام صحيح بس بعد تضحيات كتيرة، شوف قد إيه ماتوا منهم في الطريق ولولا إيمان الباقى بالثورة كانوا ماتوا كلهم وما حدش وصل، ومع ذلك لما وصلوا ما لقيوش حد من اللى كانوا معذبينهم ومستعبدينهم ولقيوهم كلهم سافروا برة زى كل الخونة.. وما اكتفوش بكده وبس.. بعتوا لهم كمان جيش الاحتلال الأجنبى اللى كان مشغلهم عشان يحتلهم احتلال مباشر ويحبسهم تانى ويستعبدهم من تاني.. شفت خيبتهم كانت تقيلة قد إيه ؟!!

باسم كابو متأسفًا: يا وقعة سودة.. يعنى إيه ؟؟ ما فيش فايدة يا تيفا ؟!!

تيفا ماهر: والله أنا معدتش عارف حاجة خالص يا باسم.. الظاهر إنه لازم نستنى الجزء الثانى من الفيلم لحد ما يتعمل عشان نعرف الجماعة دول حلوا المشكلة بتاعتهم إزاي..

كان تيفا ماهر وباسم كابو يتبادلان حديثهما المهم السالف عن الفيلم دون أن ينتبها إلى سعادة المخبر عبد التواب الذي كان يقترب منهما شيئا فشيئًا بجريدته المثقوبة بكل حرص، وبعد أن دفعا الحساب وسارا ناحية شارع أبو أشرف ليأخذا سيارة أجرة توصلهما إلى حيهما العريق، كان بوكس الشرطة في انتظارهما والمخبر عبد التواب على رأسه يزج بهما في داخله قائلا: خش جوه يا عميل منك ليه يا بتوع المتاهة يا أعداء الوطن..

وفى اليوم التالى كان الفيلم الأجنبى “عداء المتاهة” مرفوعًا من كل السينمات، حيث تم استبداله بالفيلم الوطنى الراقص “نعسان في البرلمان” بطولة الراقصة اللولبية سنية شخلع والمطرب الشعبى الكبير سعد اليتيم، لدواعٍ أمنية !!!