تحذير من رفع سعر تذكرة المترو
إيّاك ترفع يوم تذكرته
الملايين معتمدة عليه
ساعة الصبح اتفرج شوف
تلقى ألوف تترص يا بيه
كله بيحسب بالسحتوت
دخل مفيش ف هترفع ليه؟
عايز ترفع زود راتبي
علِّي مراتبي
وإحنا ساعتها نقولك هيه!!
مش طايلين الحد الأدنى
وحدك أقصى ياعيني عليه
شغل مخك أيوة وفكّر
قبل ما دمي يا باشا تعكر
قبل الأيد ما تشحور جيبي
والجنيهات جوّاه تتكدر
قبل ما تمسح جيبي يمينك
إدي المصري لحقه وقدّر
الفقران في بلدنا الملطش
كله علينا يا ناس يتشطّر؟
واللي رواتبه في شهر ألوف
مكسوف منه عشان متيسر
والغلبان خرّمت جيوبه
تحرق قلبه ودمعه اتبعتر
عض القلب هسيبلك عضة
أمّا رغيفي عليه هتحسّر
جوز جنيهات واحسبها معايا
هي الراحة وهي الجاية
همّا يدوب مش هدفع أكتر
لسه التوك توك وأم حمادة
والمصاريف على ودنه بتكتر
يا إما هجيبلك كل عيالي
وخد ملاليمي واصرف بعتر
