أبين زين وأضرب الودع
أبين زين.. وأقول على المستخبى واللى مش معروف.. أضرب في ودعى.. وتمللى بدعى.. والمستخبى بقوله ع المكشوف.
الودع بيقول يا عالم فهموني.. الحكاية إيه بلاش تستعبطوني.. ناس بتخطب فرحانين قدام عيوني.. ناس بتصرخ قرفانين وبيسألوني.. هو حق الشعب ضايع ليه ما بين من يحكموني.. قلت إيه هي الحكاية.. نفسي أعرف طمنوني.. قالوا واحد خد براءة اسمه حسني.. كان بيحكم أفلاطوني.. هو وابنه وحزب حاكم ضيعوني.. نهبوا مال الشعب كله ومن جشعهم جوعوني.. قلت له ناس واقفة تهتف زيكم وبيعزموني.. مبسوطين من حكم عادل للقانون متفهموني.. قالوا مصر بقت ضحية للي عايزين يشفطوني.. رد واحد كان بيسمع للحوار قال اسمعوني.. فيه لكم دستور ودولة.. فيه نظام يحكم قانوني.. فيه رئيس للشعب عارف مين شمالي ومين يميني.. قلت أنا فهمت الحكاية.. إنتو ليه بتحيروني.. اللي ضاع ضاع واللي باقي اتحاد به تسعدوني.. وحدوا صفوفكم شبابنا.. مصر بتقول انصفوني.. فيه دول عايزة المؤامرة تكتمل ويقسموني.. القضاء طبق قانونه.. والمحاكمة في العلن قالت شفوني.. اللي عندي قلته كله بالقانون لا تظلموني.. رد واحد معترض قال د الحقيقة.. يا جماعة اعذروني.. كلنا عايشين في محنة.. محتاجين من يحتويني.. بالتفاهم والمحبة.. مش صداع فكري وديني.
