في ذكرى وفاة "نجم".. ننشر آخر قصائده "سيادة المخلوع.. ارجعلنا"
مضي عام على رحيل "جيفارا الكلمة المصرية" أحمد فؤاد نجم، الذي توفى في 3 ديسمبر 2013، وفي هذا اليوم ننشر آخر قصائد نجم، والذي ربما نرى في عنوانها نبؤة لحكم البراءة الذي حصل عليه محمد حسنى مبارك ووزير داخليته ومساعديه في 29 نوفمبر الماضى.
القصيدة بعنوان "سيادة المخلوع.. ارجعلنا"، وتقول كلماتها:
مش انت واحد مننا ؟؟
وعمرك في يوم ما سرقتنا
...ولا خدت مليم مننا
ما تيجي طب ترجعلنا
تقعد بأهلك وسطنا
أهو مرة تاكل أكلنا
وتلبس يا خويا من لبسنا
وتعيش في حارة أو في شارع زينا
قلت إيه ؟؟ يا حارق دمنا
سيادة المخلوع... ارجعلنا
وغداك يا سيدي عندي أنا
رز وبطاطس مسرطنة
لحمة ؟؟... مفيش من سنة
فاكهة ؟؟... تعيش انت وأنا
والشاي.. بآخر معلقة م السكر اللي كان عندنا
اشرب وفوق وركز بقه.. علشان نكمل حكينا
سيادة الرئيس... ارجعلنا
مش سبت الحكم.. لأجلنا ؟؟ـ
ما تيجي تسمع حكمنا !!ـ
أفكرك ؟؟ ولا انت فاكر زينا
قطار اتحرق من كام سنة
وغازنا اللي طار من أرضنا... لعدونا
وعبارة مللي بيغرقوا..!! غرقت في عرض البحر وراحوا أهلنا... والجاني فلسع مننا
ومركبة بأحلى شباب... ييجوا من إيطاليا غرقانين.. والقرش ياكل لحمنا
والله كانوا زينا
ويمكن أحسن مننا
لهم بيوت وولاد وعيشة وحلم.. زي حلمنا
اتغربوا واتبهدلوا.. لما الفساد طال كل حاجة في أرضنا
واللي ما ماتش.. قاعد في غربته.. والغريب بيذلنا
أقول كمان ؟؟ ولا كفاية... واهو انت عارف عننا
اصبر هتسمع حكمنا
سيادة الرئيس... ارجعلنا
ولو انت واحد مننا
فعلا يهمك أمرنا
بينا عالنائب العام.. تفتنله على ولاد الحرام... مصوا بلدنا ودمنا
وافتن دي فتنة مش حرام.. ده حقنا
دا لو انت واحد مننا
اصبر هتسمع حكمنا
سيادة الرئيس... ارجعلنا
اقعد معانا وزينا
هعرفك.....ـ
دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر واحكي وقللهم.. وقللنا
واستسمح الروح اللي منورة في الجنة عند ربنا
هتقول مكنش قصدنا ؟؟ـ
دول ماتوا غصب عننا ؟؟ـ
كداب وفاجر.. واللي يصدقك زيك.. والكدب ريحته منتنة
تتشل إيد اللي ضرب،، واللي أمر،، وعليكوا لعنة ربنا
أصبر هتسمع حكما
أيوه بقول ارجع لنا
ياللي سرقت حلمنا
وغربتنا ونهبتنا... وفي كل حتة أهنتنا
إحنا اللي سال دمنا
في الأربعين وإسكندرية والتحرير يشهدلنا
آدي القفص... اقف هنا
والشعب يحكم.. مش أنا
صدقني... هي بينة
من فوق سبع سماوات.. قالها ربنا
العين بالعين والسن بالسن... وهو دا بقه حكمنا... ومفيش غيره عندنا
