فجر الخوف
رن التليفون..
كان صوته ممزوج أحلام
قال لي
بـــ
ح
ب
ك
صدقت
رعشة.. خوف
لمست.. قلبي المكسور
فحاولت أبلع كل كــــلامي
المغزول.. أحـــــــــــزان
نفس الأغنية في ودني
بتقول لي أكيد
فأنزع خوفي وأجري عليه
وشطوط أملي
تشيلني بعيد
ألمس ضعفي
وأكتم حرف في قلبي عنيد
فنجان الشاي
لسه بنكهة شوقي
الملضوم أوهام
والفستان الأبيض
لسه في أوضة نومي وحيد
ألبوم فاضي
وسطوة جرح بتنهش قلبي
ضحكة شمس
في توبها المتلون بغيوم
وصريخ مكتوم
رن.. التليفون
وأسمعني.. بأقول.. إزاي
يحلف بالريح
والنخلة المتوضية دموع
أني حبيبته
والشوق المداري في قلبه
قرب يخرج ويبوح
وأن مسافة القرب بعيدة
فأرسم حلمي
على فرع النخلة المكسور
وأهز الجذع
يمكن ينزل رطب الجنة
لكن.. أبدا
فجر الخوف بيلون
كل نهار مرسوم بالنور
