شلاليت عم فريد
اليمن شلوت.. وسوريا شلوتين
أما ليبيا كلها شلاليت يا زين
حتى لبنان والعراق.. وبفلسطين الوباء
إحنا رايحين قولي فين؟!
العروبة عندها مليون سؤال
مين يجاوب أو يشارك في الجدال
إيه سبب كوارثنا.. ليه ظالم يدوسنا؟
هو لسه فيه معارك أو نزال؟
يا جماعة فهموني أنا عقلي طار
العرب رايحين لفين وسط المرار
كله شايل بندقية.. والمصايب هي هي
والشعوب المبتلية بالقرف طالبة الفرار
ياعرب فيه ناس عينيها مفتحين
عايزة تفضل فوق قلوبكم مطحونين
يركبوكم وبدولارهم يدبحوكم
وإن نطقتوا يعدموكم.. مبسوطين
يا صلاح الدين يا خالد ياابن ناصر
مين بقى في الأمة كسبان واللا خاسر؟
افهموها يا عرب.. التاريخ لو ينضرب
كلنا حنضيع في وسط طوفان وكاسر
كل يوم أفضل أهاتي وأقول وأعيد
لما أمى قالت لي اسكت يا فريد
كل حبة قالب دماغنا.. كلام وجعنا
قلت مش حانطق ياحاجه من قريب أو من بعيد !
