أبين زين واضرب الودع!

أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف..

أمريكا بتقول لداعش بطلوا إرهاب.. وبلاش تقولوا كلام فيه كلنا نرتاب.. كل الدول قررت تضربكوا بالقبقاب.. لأنكم كالوحوش المهلكة في الغاب.. بتقتلوا وتنهبوا في شعوب بدون أسباب.. وكل شيء نرفضه لازم يكون له حساب.. شاطرة يا أمريكا خالص.. رأي كله صواب.. لكن بقى إسرائيل تقتل شيوخ وشباب.. تغمضي عينيكي أمريكا عن الإرهاب.. وتقولي قتل الصهاينة للعرب لا عتاب.. وسحلهم للعرب لعبة من الألعاب.. وغزة والقدس والضفة بهم أسراب.. من المقاومة اللي عايشة وسطهم أغراب.. ونفسي أعرف بقى مين اللي فتح الباب.. لإسرائيل بين شعوب عربية في استتباب.. فبلاش بقى تلعبي لعبة دخيل كداب.. عايش بوجهين ما بين صالح وبين نصاب.. ورقك خلاص انكشف يا باب لكل خراب.. داعش صحيح تستحق عقاب وألف عقاب.. وإسرائيل تستحق الطرد.. لا استغراب.. لأنها دولة مدسوسة لها أذناب.. وكل شيء عنهم معروف في ألف كتاب.. والحق حيبان في يوم ونكشر الأنياب.. لكل ظالم مفكر له حقوق وحجاب.. لأ.. لا.. يا أمريكا عمر الحق ما يوم غاب.