أبين زين واضرب الودع!

أبين زين.. وأقول على المستخبي واللى مش معروف.. أضرب في ودعى.. وتمللى بادعى.. والمستخبى باقوله ع المكشوف
أنا ودعى بيقول مفيش فايدة بقاله سنين.. نسمع كلام أي حاجة وكلكم عارفين.. إن الثقافة عليها الرحمة يا ثائرين.. ووزير ثقافتنا مش عارف يروح على فين.. والفرق إيه بين زمان والآن غير التفانين.. وكلمتين في الهواء الطلق للملايين.. في مؤتمر أو في ندوة ونصرف القرشين.. والمعترض ينطرد ومالوش مكان أو دين.. مع إن بحر الثقافة فيه حياة ملايين.. والثورة ثورة عقول عارفة تروح على فين.. تنزل لجماهير ونبقى وسطهم عايشين.. في القرية في المدرسة وبساحة الميادين.. لأن فيه ناس بتلعب بالعقول قاصدين.. يشوهوا مصرنا ويزيفوا المضامين.. ويرسموا في العقول صورة لشعب حزين.. ويغيروا فكرة للتشويه باسم الدين.. والرد مطلوب لكن عن طريق فاهمين.. معنى الثقافة لشعب.. فيه فئات تايهين.. بين فكر مدسوس وفكر سليم ما لوش ناشرين.. والمرحلة مرحلة تغيير وفكر منير.. ومين بقى يا وزير ثقافتنا يبقى مدير.. لثقافة الشعب غيرك وإنت كنت خبير.. ورئيس مجالس ثقافة خاصة بالتنوير.. أرجوك تقدم حلول يصبح لها تأثير.. علشان نرجع لمصر تاريخ وفيه تباشير.. لحضارة محتاجة عزم وفكر ناس مغاوير.. وإن كنت حيران ومش قادر على التغيير.. قول للثقافة الوداع وتصبحى على خير.