برة نفسي!!
من سنين
وأنا برة نفسى باتنفض
فاتحة شبابيك البراح
ع المنتهى
وعشان ما أنا زمنى عنيد
قلبى عرف
إنى باموت من وقتها
يمكن تاخدنى الذكريات
فأغرق في بحر من الدموع
وساعات ببص على اللى فات
وأتمنى لحظة للرجوع
يمكن أرجع
نبض أيامى اللى مات
وعشان
ما أنا لسه بخاف
باجرى وابوس الشمس
بشفايفى الضعاف
ما أنا أصلى باحلم
إنى أكون حاجة
وحاولت أكون
ما لقيتش ولا حاجة
لقيتنى بارفض دنيتى
برة السنين
كرهت ملامحى
كل حاجة
وابتدا الناى الحزين
يعزف على وجعى اللى زاد
ما عرفتش أعمل أي حاجة
غير إنى أموت
وأسمع نواح الشمس
ع العتبات.
