أبين زين واضرب الودع !

- أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف

تعبت أقول كل حبة فيه فلول سايبين.. عايشين في وسط البلد وعلينا متآمرين.. ومحتاجين ضربة واحدة.. بدون حذر أو لين.. لكن صحاب القرار في الزحمة مش سامعين.. وكل يوم فيه ضحية أهلهم مساكين.. والناس بتصرخ سيبونا نأدب الضالين.. الحكمة والاتزان مع عصبة المجانين.. م المستحيل راح يفيد أو يعدل الموازين.. عايزين نشوف الحكومة فتحت لها عين.. وشافت إن الطريق الصح مش طريقين.. هو طريق ضربة واحدة تقضى ع الملايين.. ويرجع الحق أقوى من فلول حاقدين.. في تنظيمات إرهابية مدفوعين تابعين.. لدول بتضمر لمصر الحقد والتخوين.. وكل حبة وحبة ينصبوا لها كمين.. لكن ربك كريم للمخلصين ومعين.. ومهما كان غدرهم جيشنا رزين ومتين.. والشعب واقف معاه زى الأسد في عرين.. لكن نصيحتى بلاش يبقى كلام خايفين.. ومفكرين نفسهم حكماء وأهل يقين.. ويلعبوا بالعصاية بين شمال ويمين.. ولعبهم انكشف يادكاترة مستترين.. بفكركم واستتاركم في عباية الدين.. خلاص بقى ريحونا شبعنا من آسفين.. مصر بقت مصر تانية ناسها منتبهين.. وجيشها صاحى وواعى لأى متآمرين.. والرحمة والمغفرة لشهداء وطن غاليين.