نشطاء "فيس بوك" عن "عيد الحب".. نهال: السنجل جنتل.. أسماء: هروح متحف أبو سنجل.. إسلام: هعمل عبيط.. أميرة: أيام سودة لكن سعداء.. نيفين: الارتباط إحباط.. غادة: السناجل مغلولين والمرتبطين مفلسين

رصدت "فيتو" تعليقات نشطاء موقع التواصل الاجتماعي "فيس بوك" حول عيد الحب المصري، وصاحب فكرته الصحفي الراحل مصطفي أمين، وكانت ردود الأفعال حول الفكرة وطريقة الاحتفال مختلفة من شخص إلى آخر.

قالت ياسمين: "يوم الفلانتين ده تحس إنه يوم كئيب على السناجل، وتلاقيهم يا عينى متنكدين، والمرتبطين تحس إنهم معندهمش دم"، وعلقت نور قائلة: "هي كده تناحة، أنا سنجل ومرتاحة"، وأضافت نهال: "السنجل جنتل".

وقال طارق: "الفرق بين عيد الأضحى وعيد الحب، عيد الأضحي المسلم بيشتري الخروف، إنما عيد الحب الخروف هو اللي بيشتري للهانم دبدوب"، وعلق إسلام: "طبعا ملناش دعوة بهذا العيد إحنا لاقيين ناكل أساسا أصلا إحنا مامعناش فلوس نعدى الناحية التانية".

وعلقت أسماء: "أنا يوم الفلانتين هروح متحـف أبوسنـجل يا تري هلاقي حد هناك"، "وعلقت هند ساخرة: "قال يامستنى يجيلك فى الفلانتين هدية، يامستنى ماكدونالدز يعمل ملوخية"، وأضافت تقى : "على كل عريس.. راعوا شعورنا بقا"، وعلق إسلام قائلا: "حسبي الله ونعم الوكيل بتفكروني ليه بالميعاد كنت هعمل عبيط".

وأضاف محمد: "وقف الخلق ينظرون جميعا .. كيف أقضى الفلانتين وحدى"، بينما قالت إيمان: "ياااه دا أنا كنت نسيت، وبعدين عرفته من الدباديب اللى فى الشارع"، وعلق مروان قائلا: "وأنا بقول الدباديب كترت عند الجامعة ليه".

وقالت أميرة السعدنى: فلانتين إيه بقولك أيام سووودة .. لكن سعداء"، وأضافت مى: "لما تشوف محلات الهدايا فى الفلانتين وانت سنجل .. بيبقى شكلك بااايخ أووى"، بينما قالت نيفين باسم: "السنجلة جنتلة والارتباط إحباط"، وأشار أحمد قائلا: "لأ.. فيه حاجة اسمها حب واللي بيحب حد مش ضروري يستني يوم الفلانتين علشان يجيب ورد أو هدية واللي بيقول مفيش حاجة اسمها حب أو إن الحب حرام ميعرفش حاجة عن الحب وياريت ميفتيش".

وعلقت نهى مندهشة: "هو مش المفروض إن اليوم دا فى فبراير وﻻ إيه مش فاهمة؟!"، وقال محمود: "يوم 4/11 ده والله يوم عيد ميلادى كل مابيجى بزعل إنى سنجل"، وأضاف محمود: "أنا ما كنتش أعرف.. أنا هالزم بيتنا بكره علي كده"، وأشار عصام قائلا: "احنا معندناش غير حب بابا وماما ودول اتوفوا من زمان يبقي مفيش غير حب الله وحب الوطن".

وقال عمار: "والله يا معلم أشتري بفلوسي سيجارة تعدل راسي ولا أشتري دبدوب لبنت تشيب راسي"، وأضافت غادة: "تحس إن السناجل مغلولين والمرتبطين مفلسين".