«كان عندي مدرس سادي.. هاشتاج يفضح ممارسات العنف في المدارس».. هاميس: «أستاذ العربي بيمدنا على رجلينا».. محمد: «مدرس بيضربنا علشان الدرس الخصوصي».. عمر: «معلم الموسيق

دشن نشطاء موقع التواصل الاجتماعي «تويتر» هاشتاج يحمل عنوان "كان عندي مدرس سادي"، وذلك لتناول مشكلة العنف داخل المدارس من خلال قيام المشاركين بسرد تجاربهم الشخصية مع معلميهم.

وكتبت منال: "في الثانوية كانت عندنا مدرسة لا تنجب، وكان عندها عقدة من الطالبات المتزوجات، خاصة إذا كانت حامل.. تمارس عليها كل أنواع الانتقام". 

وأضافت هاميس: "أستاذ عزيز بتاع الرياضيات مكنتش بفهم منه حاجة، وكان بيضرب بسن المسطرة على ضهر إيدينا وأستاذ خيري بتاع العربي كان بيمدنا على رجلينا".

وقال فريد: "السادية مش ضرب بس.. أنا أعرف مدرس كانت متعته يهزق الولد قدام صحابه ويضحك بعلو صوته لو الولد عيط".

وتابعت صفاء: "مدرس الجغرافيا في مدرستي الإعدادية ضرب زميلتي بالعصاية لغاية ما أغمى عليها.. أهلها ضربوها وخلوها تبطل تعليم".

وقالت شيرين: "مدرس 5 ابتدائي كان بيمدنا على رجلينا علشان الواجب والصبيان هما اللي يمسكوا رجلينا.. عجب والله.. شوفنا بلاوي".

وكتب آدم:" مدرستي في 3 ابتدائي ضربتني على ودني عملتلي ثقب في طبلة الأذن وجبت ملحق في العربي بسببها".

وقال عمر الهادي: "الأستاذ مصطفى بتاع الموسيقى.. كان بيدخل يضرب الفصل كله في حصة الفرنساوي عشان يبهر زميلته المدرسة".

وكتب عمرو وديع: "٨٠٪ من المدرسين معقدين وده برضو كان بسبب وضعهم المتردي ماديا ومعنويا، وعلي فكرة في مدرسين قتلوا أطفال من الضرب وده مثبت".

وكتبت ميرا: "مدرسة الرياضة اسمها فوقية كانت بتضربنا في عز الشتاء بحرف المسطرة على صوابعنا لو عملنا الواجب غلط".

وقال عبد الحكم: "مدرس الإنجليزى اتفصل.. كان غبي آه والله.. اللى يجاوب ويحل صح يفضل يضرب فيه والبليد يصفق ليه".

وكتب نور: "ماكنتش أعرف أرسم وكانت مدرسة الرسم تقرص من تحت الإبط وتحط القلم بين صوابعنا وتضرب بالمسطرة بسببها هربت مرة وكنت هاتوه".

وكان للعربي رأي عكس اتجاه الأغلبية وكتب: "المفروض الوزارة ترجع الضرب تاني.. أهالينا كانوا متربيين وناجحين وطلعوا قادرين على مواجهة الحياة".

وكتبت همس: "نظرة واحدة على الهاشتاج ده تعرف حال التعليم وصل لإيه وليه بيخرج ناس معقدة تطلع على المجتمع بصراحة ولا أي اندهاشة من اللى قريته".

‫وكتب محمد مهدي: "كان عندي مدرس كان في تانية إعدادي، كان بيضرب بجلدة عربية بيجو.. المصيبة إني أخدت عنده درس اتقاء لشره رغم إني كنت باخد عند غيره".

وقالت ميار: "كان عندي مدرسة رياضيات في ابتدائي، وكانت سبب عقدتي منها لوقتنا دا اللى بتغلط كانت بتمسكها من الضفيرة تخبطها في السبورة".

وأضاف محمد زكي: "حد يصحي وزير التعليم ويجيبه هنا يشرب الشاي ساعتين واحنا نكمل حكاوي يمكن نقدر نلحق الأجيال الجاية".