بالصور.. هاشتاج «تشتهر مصر بـ».. منة: «الفنانة نادية الجندي بتضّحي دايما».. نرمين: «الكلام يدخل من هنا يطلع من الناحية التانية».. نورا: «2 جنيه فول كل جنيه لوحده
دشن مستخدمو موقع «تويتر»، اليوم الخميس، هاشتاجا يحمل عنوان: «تشتهر مصر بـ»، يمثل بعض الظواهر التي يعانى منها الشعب المصري، ومن جانبها رصدت « فيتو» أبرز التعليقات.
مصطفى جو: «تشتهر مصر بخالتي بتسلم عليك».
نورا فتحى: «نظرية إن بـ 2 جنيه فول كل جنيه لوحده أكتر من بـ 2 جنيه فول على بعض».
محمد فرحات: «أنها بلد المجروحين اللي بنى مصر كان في الأصل مصطفى كامل».
منة الله: «الفنانة نادية الجندي اللي بتضّحي دايمًا من أجل مصر».
بني سعد: «زراعة البانجو ودي الجغرافيا الحديثة بقي».
المصرى الأصيل:«زراعة القطن طويل التيلة».
لولا: «الراجل إلى بيموت في المحشي ويقولك يا ستات يا بتوع الفتة والمحشي.. طيب بزمتك محيط وسطك كام».
بوس بوس: «الرجالة إلى بتتريق على سواقة الستات والمشكلة كلها أن الستات في العربيات مش بتعبره وترد على ابتسامته اللزجة واستظرافه».
ميدو الألمانى: «إن شعبها لطيف ومتسامح ولما بيعرفوا إنك عندهم سائح بيعاملوك بكرم وبشاشة وبيقولوا لك لما تيجي تحاسب ما تخلى عنك يا باشا».
رحمة سعيد: «الرجالة إلى بيتريقوا على جمال البنت المصرية ويتغزلوا في الأجنبيات على الرغم من أن أحلى واحد فيهم شبه الضيف أحمد».
عفت: «الضوضاء والإزعاج وعدم مراعاة ظروف الغير».
ميدو المصرى: «الهضبة سعيد الهوا، مُكتشف الأمباليه وإنه بيدي اتنين فرقعة في الشكمان ورا».
سهير: «تشتهر مصر بـالفطير المشلتت».
دولى: «أطفالها الصغار وهما ماشين في الشارع بيغنوا أديك في الجركن تركن أديك في الحارة سجارة أديك تلبس نضارة».
الحمد لله على نعمة مصر: «سياحتها، عايز بحر تلاقى أبيض وأحمر عايز تراث تلاقى حديث وقديم إسلامى وقبطى وفرعونى غنية بالتاريخ، وجغرافيا مخلياها ملكة».
أحمد صلاح: «أنها ذكرت في كتاب الله ومحفوظة بوعد الله بحفظ آياته ليوم الدين».
أم ميدو: «حسن الأخلاق والتربية».
محمد أمام: «الهتاف ضد الداخلية.. ثم الجري من الداخلية.. ثم الجري وراء الداخلية.. ثم الهتاف للداخلية».
مازن: «بتشريفها وذكرها من رب العالمين في كتابه الكريم عدة مرات».
عمرو وديع: «الواد اللي شايل سلك كاميرا الڤيديو في الفرح وقاعد بيكعبل المعازيم وهم بيرقصوا».
أحمد محمود: «الفول والطعمية».
إبراهيم الشامى: «إلغاء السؤال الثانى من مادة الفيزياء في الثانوية العامة بسبب بكاء وإغماء الطلاب وأولياء الأمور».
شكرى: «كل سنة وإنت طيب اللي بتتقال طول أيام السنة بسبب ومن غير سبب».
