ربيع العُمر
يا بستان الفرح مالك
راسمها خريف
ربيع العُمر بيعدى
وأزمة ريح
تشيل ورقك من الأغصان
بصوت يملا القلوب تخويف
يهز الأرض كام بركان
ويتقابل بِحَر الصيف
********
ورمش العين مالوش ساتر
ولسه قلبى قال فاكر
حياته ماشية بالمواويل
وقصة قيس مع ليلى
هتطلعله من الصورة
وتتحول لأسطورة
تعيش تانى في دور تجسيد
وأنا عن نفسى فهِمته
وعلمته أصول العيش
لكن يرجع يقول تانى
وعنتر ليه ما فات عبلة
مدام الدنيا مش قابلة
تكون مسرح
لقصة بيعيشوها اتنين
*******
يا أحلام الخيال فوقى
عشان عمرك ما هتشوفى
قمر قابل في يوم شمسه
ولا نجمه بتتغزل في شكل الليل
وطول صبره على الضلمة
ولا صياد كتب غنوة
بتوصف حبة للشَبَكة
وهي بتستلف رزقه من المَولى
و تديله حياة تانية
يرجعها بحمد كتير
