رئيس التحرير
عصام كامل
Advertisements
Advertisements
Advertisements

"مقاطع من الملح والبحر" قصيدة للشاعر سالم الشهبانى

الشاعر سالم الشهباني
الشاعر سالم الشهباني

(1)
الملح
أدى الوجود للبحر
العشق بينهم أزل
وأنا وانتى بينا الخوف جعل
كل الدروب ملح
فلتبتدى كل النوارس
فى الرحيل عن بحرنا

فلتبتسم فينا الجراح
فليضحك الحزن ضحكة المشهورة
أنا وانتى..برين بعاد
رغم الشبه فى الصور
(2)
مابين المد...والجذر
احتمال تالت
لحظة ثبات البحر
| لحظة ثبات البحر
انكسار للموج |
كان ياما كان
للروح شطوط آمنة
والعشق كان الضلّ
كان السما التامنة
إن حد فينا ضلّ
مين اللى قال نثبت
رغم انكسار الضل
(3)
للبحر شبّاك ع السما
مين يرتجيه يغرق
شرع الأحبة العشق
إن يأمرك...تعشق
لمّا بكا البحر...
صبغ السما أزرق

(4)
المطر
ابن السما...
والبحر
ما أخدش زرقة السما
ولا خد ملوحة البحر
...........
بيني وبينك شىء
ما أخدش شىء...مننا
بينى وبينك شتا
أربع فصول فى الشهر
(5)
أوّل كلام الحياة
صرخة وصوت
هربان بطول الحياة
..................
آخر كلام الحياة
صرخة وصوت
الموت..... صداه
....................
بنهرب
والهروب مرسى.
ونفرح
والبكا...حارس
للكون جهات أربع
انتى اتجاه خامس
Advertisements
الجريدة الرسمية