الباشا من الزمالك

الحاجة المستفزة جدًا خالص للغاية عالآخر الجو بتاع مترو الزمالك لو اتحفر هيخلي اللي يسوى واللي مايسواش يدخلوا الزمالك، والبلطجية والعشوائيات إلخ إلخ إلخ..

على أساس إن التوحيد والنور في ٢٦ يوليو ماكانش عشوائيات، وعلى أساس إن الصاوي الإخواني وأنشطته تحت الكوبري مش عشوائيات، وعلى أساس إن فك كوبري أبوالعلا ما كانش عشوائية، وعلى أساس إن الركنة صف تاني وتالت ورابع عند نادي الجزيرة مش عشوائية!

وعلى أساس إن الزمالك شأنها شأن كل أحياء الجمهورية مليانة تجاوزات وانتهاكات صارخة للقانون من الناس المتعلمة ولاد الناس دي مش عشوائية.. بس الحق مش على أهالي الزمالك، الحق على اللي بيسألهم بالأساس..

طب ماحدش سأل أهالي باب الشعرية وعبده باشا والعباسية ليه قبل ما يحفروا المترو هناك؟ ولا الحكومة عندها خيار وفاقوس، وولاد البطة السودا، وولاد البطة البيضا.. وكله بيتعامل مع الفقير والعشوائي والأمي وكأنها غلطته، في حين إنها لو غلطة حد، فهي غلطة الفاهم والمتعلم وابن الناس اللي ساب الدنيا تتفرتك للدرجة دي..

كله يسد مناخيره يا كوكي ويا سوسو منك له.. إحنا نازلين النفق كلنا، مش ناس وناس على فكرة.. ولا حتفرق زمالك من إمبابة من بولاق الدكرور.. كله يسترجل كده لحد ما نعدي من الخيبة اللي إحنا فيها.. بدل ما نتكلم عن "الحفاظ على الزمالك".. نحافظ على شوارع القاهرة، وأحياء القاهرة.. وبدل ما نتكلم عن "الحفاظ على النخبة".. نحاول نخلق نخبة جديدة بالتعليم والتربية والصحة والبنى التحتية..

وبدل ما نحاول نخلق حوض سمك في وسط القاهرة نروح أحيانًا نتمشى وسط أشجاره، ونتفرج على معماره، وأهله "الهاي لايف"، نحاول نخلي مصر كلها مليانة شجر ومباني محترمة متواضعة..

مش شرط عمارات ما حصلتش زي بتاعة الزمالك، وبدل ما نتغنى بإنجازات أهل الزمالك في التنمية المحلية، والحفاظ على حيهم نضيف من خلال اتصالاتهم بمؤسسات الدولة، وسيطرتهم بالعلاقات على الحي، نحاول نخلي كل حي في القاهرة "زمالك" ونشوف الزبالة بتتلم إزاي وبتتدور إزاي.

ولا يعني الثورة تيجي لحد الزمالك وتقف، أومال فين الزملا الأفاضل من الزمالك اللي نزلوا معانا التحرير وهتفوا للعدالة الاجتماعية؟ ولا يناير كانت فسحة ورجعنا البيت خلاص؟؟؟

الثورة مش بالشوكة والسكينة، وعلشان نوصل لتنمية شاملة مستدامة، لازم هنعدي يا أونكل منك له..