تعليقات نشطاء مواقع التواصل الاجتماعي على بدء العام الدراسي.. على: "دا إحنا هناكل ضرب يا خال".. كريم: "أنام ساعتين ألاقي الدراسة بدأت".. يارا: المدرسة فيها روح شريرة.. نهال: "الله يرحمك يا أجازة"
يبدأ غدا السبت العام الدراسي الجديد، وتشعر الأسر المصرية والطلاب بالقلق بسبب انتهاء فترة الإجازة والدخول إلى مرحلة جديدة.
وبدت ردود أفعال النشطاء من الطلاب والشباب على موقع التواصل الاجتماعى "فيس بوك" ساخرة لدرجة كبيرة ورصدت "فيتو" آراء الطلاب وتعليقاتهم.
"مش فارقة"
وقالت نادين جابر: "والله مش فارقة"، وأضاف أحمد جمال: "الناس الدحيحة اللي معانا جاء ميعادها"، وتابع أحمد سعيد:" مع نفسك يا حمادة"، فيما أشارت آية ماهر: "كل الطلاب بيقولوا حسبى الله ونعم الوكيل".
"أيام سودة"
وقال إبراهيم حسن: " لما الأستاذة بتاعة الإنجليزي أول أسبوع دراسة ولما تكون حامل وتقول أنا سايبة جوزي وولادى عشان أعلم فيكو.. هرد عليها وأقولها طب ما احنا سايبين الفيس والنوم عشان خاطر نتصبح بوش حضرتك"، بينما علق محمد مصرى ساخرا: "بقولك أيام سودة"، وأكد على حسن: "دا إحنا هناكل ضرب يا خال".
وأضاف خالد حسن: "تقريبًا 85% من الطلاب يشعرون بنوع من أنواع الذعر والتوتر لما يسمعوا إن الدرسة هتبدأ، ومعظمم مش هيروح قبل العيد.. الكسل شيء عظيم موت"، بينما ذهب كريم محمد في تعليقه ساخرا: "هو أنا أنام ساعتين أصحى ألاقي الدراسة كمان يومين".
وقالت يسرا عادل في تعليقها قائلة: "طالما هتكون فيه أنشطة ليه هيدخلوا المدارس قبل العيد بيومين أو حتي بكام يوم ما كانت تتأجل أحسن زي العرب بياخدوا أجازة قبل العيد بـ15 وبعده بـ10 أيام".
وقالت ميادة منصور: "أحلى حاجة أن الواحد يكون لسه دراسته ما بدأتش وإخواته رايحين المدرسة الصبح وهوا نايم سلطان زمانه ولما يقوم حيلعب مش يذاكر.. سنة أولى جامعة بقى.. براحتنا"، وأضاف عبدالرحمن يسرى: "أنا جامعة ياعم الحاج ومبقتشى فارقة معايا".
وتابعت سميرة: "والله بتبقي أحلى أيام وأحلى وقت بنقضيه مع أصحابك"، وقال محمد سعد: "إحنا مش بتوع المدارس يابا"، وأضاف خالد حسن: أصبحنا وأصبح الملك لله.. والله لقضيها زى كل سنة"، وأكدت زهرة العلا:" حرام عليكو متفكرونيش"، وقال طارق على: " الدراسة سجن ملهوش منافذ"، وأكدت يارا خالد:" المدرسة.. تحس إنه فيها روح شريرة".
وقال حامد: "جات الأجازة فجأة وراحت الأجازة فجأة ونزلت دمعتي"، وأضاف محمد مانو:" حاسس إن عندى هبوط حاد"، وتابع منعم رشاد: "أنا نفسى أتصور سيلفى مع المدرسة وهى بتولع"، وأكدت ياسمين حمزة: "مفروض الدراسة تكون زى كأس العالم كل 4 سنين ومصر ما تدخلهاش".
"الله يرحمك يا أجازة"
وأضافت نهال سمير: "الله يرحمك يا أجازة مع السلامة ياغالية"، وقال محمد عبده: "أنا بقى نفسي أرجع المدرسة تاني..على الأقل الواحد مش شايل مسئولية".
