قراء «فيتو» ردًا على فتوى "تحريم الشات".."نور": انتوا عاوزين كل واحد في كوكب لوحده.."محمد": سايبين المواقع الزبالة ليه؟.. "أحمد": دار الإفتاء أكثر خبرة.. و"شهد": اتقوا شر الذنوب

في ضوء الفتوى التي أطلقتها دار الإفتاء حول تحريم المحادثات الإلكترونية «الشات» بين الشباب والفتيات على مواقع التواصل الاجتماعي إلا في حدود الضرورة، رأت دار الإفتاء أن محادثات الجنسين عبر «الشات» تمثل بابًا من أبواب الشر والفساد ومدخلًا من مداخل الشيطان وذريعة للفساد، وقواعد الشريعة تقضي بأن سد الذرائع مقدم على جلب المنافع، وفي إطار ذلك قامت "فيتو" برصد استطلاع رأي قرائها على الفتوى، فتباينت ردود الأفعال ما بين مؤيد ومعارض للفتوى، وكل منهم له مبرراته.

احنا ولاد وبنات

وفي هذا الإطار، قالت الناشطة "نور على": أنا مش فاهمة أمال ربنا خلقنا وﻻد وبنات ليه علشان نقطع علاقتنا ببعض ! يعنى ما كل واحد يعيش في كوكب لوحده بقى..... ياريت نرتقى بعقولنا شوية مش كل كلام بين ولد وبنت يبقى حرام وفتنة أرفتونا بجد.
أما الناشطة Aya AbdElmoaty قالت: دار الإفتاء محرمتش ليه قتل الأبرياء كل يوم !!! محرمتش ليه ترويع الآمنين اللى نهى عنه الرسول عليه الصلاة والسلام !!!!!!!!!ما فيهومش حد بيتقى ربناااا، وفي نفس السياق أضافت الناشطة Mariem Ahmed M: "ياااه ده كل اللى شاغلهم دلوقتى!! طب بالنسبة للناس اللى بتموت واللى بتتاخد من بيوتها على وش الفجر مفيش فتوى لإنصافهم!".

المواقع الزبالة

فيما أوضح "محمد حتة الروش": حرام الشات.. حلوة دي طيب دار الإفتاء مش بتتكلم عن المواقع الزبالة التانية ليه.

بينما وصفها الناشط "Belal Nady": فتوى عايمة وغير دقيقة.. تقدر تقولي بناء على إيه أصدرت الفتوى ! طب يا مولانا ماذا لو كان شات للمناقشة وتبادل الآراء أليس هذا مجلس علم ! ألن تحفنا الملائكة.. والله عليم بذات الصدور.. وماذا عن فتواكم بأن كل من يخالفكم خوارج ! وحلال دماؤهم ! منين بتجيب الفتوى ؟ من منتدى فتكات ! ربنا يهدي.

كما علق الناشط "Abdo Hesham" قائلا: هو الإفتاء ساب كل حاجة في البلد وجي على الشات طيب والمواقع الإباحية ماتكلمش ليه عليها وبعدين هما يفتوا براحتهم أنا مش هاخد كلام منهم الحلال بين والحرام بين أنا أمشي بدماغى واخش الجنة أو النار بقا أنا وربنا حرين مع بعض.

دار الإفتاء أكثر خبرة

أما مؤيدو الفتوى، فكان ردهم كالتالي، أضاف الناشط "Ahmed Abady": بالنسبة للإخوة المعترضين ايه السند بتاعكم في الاعتراض ولا هو خلقنا لنعترض حتى على أوامر الدين. أنا آسف جدا اللى انتوا فيه ده تعدى مرحلة الجهل انتوا مش هتكونوا أكثر علمًا وخبرة من دار الإفتاء ولا من الفقهاء لأن ربنا مش بيمنع أي حاجة عننا إلا لما تكون ضرر لينا انتوا عاوزين تجتمعوا بالشباب اجتمعوا براحتكم بس متحللهوش أو تحاولوا تجدوا لغلطكم تبرير شرعي لأن ده مش دينكم انتم بس ده دين ربنا وضعه ونزل بيه الرسول، ياه تاخدوا وتقتنعوا بيه كله مرة واحدة أو تسيبوه. كلنا بنغلط وممكن نتكلم مع بنات شات أو نقابلهم بس مش بنحلله عارفين أنه حرام وبنطمع في رحمة ربنا.

في حين أضاف "Tawfek Yahya": ما اجتمع رجل بامرأة إلا وكان الشيطان ثالثهما، مش عارف ازاي مش عاجبكم دينكم وبعدين أول مرة تعرفوا أن حرام الكلام بين الولد والبنت.

اتقوا شر ذنوب الخلوات

أما الناشطة "Shahd Mohamd"، أضافت: اتقوا شر ذنوب الخلوات فهى أهم سبب لذهاب الحسنات وعليكم بعبادات الخلوات فهى أهم سبب لدخول أعلى الجنات، في حين تساءلت "Mona Hussien": طيب وبالنسبة للرجال المتزوجين والنساء المتزوجات اللي طول النهار على الشات رأي دار الإفتاء فيهم إيه؟.