إحنا زي ما إحنا

بقالي أكتر من عشر سنين من عمري بعاني من تجربة اليوم المقلوب.. يعني بسهر الليل لحد ما نور الشمس يطلع وأصحى آخر النهار وممكن مع الغروب..

تقريبا بيكون البشر الطبيعيين خلصوا أشغالهم.. ماعرفش أيه السبب ممكن أكون أجبن من أني أكون جوه دايرة البشر الطبيعيين.. لأن التواجد بيولد تعامل والتعامل بيولد مشاعر كتيرة أوي..

ما علينا.. وقت حضرتك في غنى عن أنه يسمع شوية تفاصيل بني آدم معجب أو رافض لقلبة يومه، كنت في أحد الأيام هارب من النوم في بيتي وبايت برة البيت.. وبعد ماخلصت كل اللي بعمله قلت أروح أنام في بيتي.. بمبدأ سريري أولى بيَّ.. وقبل ما أوصل للبيت بنحو 10 دقايق فوجئت أننا في أواخر ديسمبر.. وامتحانات التلامذة ابتدت.. وأنا بالنسبة لي بتمر الأيام وبتجري وبتفضل كلمة التلامذة هي الأمل.. أيوة يا سيدي الأمل.. أنت فكرك يعني أنا واحد زيي مثلا عنده (أمل) في نفسه لا طبعًا أنا كل أملي في كلمة تلامذة دي لعل وعسى نوصل لحاجة في يوم من الأيام..

وأنا في طريقي للبيت.. تنحت في مشهد ومش قادر يطلع من دماغي.. قلت لما أكتبهلكم عشان تتنحوا معايا وكلنا نبقى متنحين
المشهد كان عبارة عن أب في آخر الأربعينيات ومعاه بنوتة صغيرة ييجي 10-12 سنة.. وماشيين وهما الاتنين بيحاولوا يقاوموا بقايا سلطان النوم..

عارفين اللي علق معايا ومش قادر أنساه من دماغي هو أيه.. النتيجة.. أيوة النتيجة مش النتيجة اللي بتظهر بعد الامتحان.. لكن النتيجة اللي بناخدها معانا الامتحان..

تصدق دي البنوتة أم ضفاير شايلة معاها كيس طويل من بتوع أكياس السكر.. بس شايلة جوة الكيس ده نتيجة سنة من السنين عارف بيعملوا بيها أيه بقى النتيجة؟؟

ولو حضرتك من ولاد التعليم الحكومي هاتفهمني.. النتيجة دي عبارة عن اختراع عالمي يعني المفروض عشان الناس تعرف بيه مواعيد المناسبات في السنة الجديدة بس إحنا بقى الوحيدين اللي خلناه اختراع.

جدير بالذكر.. عشان النتيجة دي بتكون مع التلميذ ليه بقى... عشان يسند عليها على التختة (الديسك) عشان التختة دي غالبا بتبقى منتهية الصلاحية يعني مليانة حفر..

وطبعا لو الطالب من دول كتب بالطريقة دي على ورقة الامتحان الخفيفة هايحصل أيه..؟؟ حاجة من اتنين يا الورقة تتخرم يا الورقة تتخرم.. عشان كده التلميذ الشاطر لازم ياخد معاه حاجتين مهمين.. رقم جلوسه...ونتيجة يسند عليها.

عشان كده روحت وأنا مطمن جدا.. إذا كانت التختة بتاعتي اللي بقالها 20 سنة في المدرسة لسه مخرومة والخرم ماتسدش..

تفتكر يعني أيه اللي ممكن يصلح الباقي قصدي يسد الباقي، أرجو اوعى تركز في أي حاجة حواليك هاتتعب.. صدقني هاتتعب.