المغير "يخون" أبو الفتوح والهلباوي.. ويشكك في قيادات الإخوان بتحالف دعم الشرعية.. صلاح سلطان رفض تنفيذ أوامر الإخوان بالعودة في أحداث مسجد الفتح.. قيادات التحالف أصدرت الأوامر بانسحاب الإخوان فقط

للمرة الثالثة على التوالي أكد أحمد المغير، الناشط الإخواني والمعروف إعلاميًا برجل الشاطر، تبرؤه من تحالف الشرعية.

وكتب المغير تدوينة على صفحته الرسمية على "فيس بوك" يسرد فيها حكاية مسيرة الإخوان في أحداث رمسيس 2013.

فقال: "في 16 أغسطس (أحداث رمسيس) كنت مع المسيرة، اللي اتحركت من مدينة نصر تجاه رمسيس، وانطلقت بعد صلاة الجمعة، ووصلت على المغرب تقريبًا دون مواجهات أو اشتباكات إلا عند غمرة تصدى لها الشباب، لما وصلنا لمسجد التوحيد، اللي كان بمثابة مستشفى ميداني أو بمعنى آخر مكان لتجميع جثامين الشهداء- كما نحسبهم - وتوثيقهم، سألنا عن الأوضاع من الناس اللي جاية من رمسيس، فحكولنا بشاعة اللي حصل، وأن المواجهات مستمرة، لكن تقريبًا تمت السيطرة على الميدان بعد أكثر من 250 شهيدا، وكان كل اللي بيجي من هناك بيشدد على أهمية التحرك للحفاظ على الميدان، ولدعم المقاومين فيه".


و"المغير" أضاف: "وفعلا بدأنا نجمع نفسنا ونتحرك، وإذ فجأة نلاقي آلاف بترجع من الميدان أفواج وكل ما نسأل حد يقلنا راجعين تاني ونلاقيه ماشي مروح!! كدت أجن وقعدت أصرخ في الناس عشان يرجعوا وأن الناس محتاحينا في رمسيس، وكل اللي أكلمه يهز رأسه ويمشي يروح!!! قعدت أسأل وأتقصى لغاية ما لقيت حد بيقول إن جالهم على التليفونات رسالة من التحالف تفيد بالانسحاب، افتكرناها حيلة مخابراتية لأن بأمانة مكنش ليها معنى غير كده! اصل بعد 250 شهيد وبعدما بدأت تسيطر على الأرض وعدوك في هزيمة تلاقي فجأة معظم اللي معاك انسحب!!!!".

استطرد "المغير" في قوله: "قعدنا نحذر الناس على قدر ما نستطيع وكان فيه بيستجيب والأغلبية بيمشوا وهما بيهزوا رأسهم ببلاهة إنهم راجعين! عرفنا بعد كدة أن رسالة الانسحاب صدرت فعلا من قيادات الإخوان في التحالف إلى الإخوان فقط دون غيرهم، الأمر اللي رفضه د. صلاح سلطان والمجموعة اللي معاه تنفيذه، وطلع قال للناس امشوا انتوا وأنا قاعد مش ماشي (المجموعة اللي اتحاصرت في مسجد الفتح بعد كدة).

بعد ذلك يقول "المغير": "الموقف ده نزع كل ما تبقى من ثقة داخلي لقيادات التحالف وكانت أول علامة واضحة بالنسبة ليا لا تقبل الشك أن التحالف ده، وتحديدًا قيادات من الإخوان داخله مخترقة تمامًا، ده إذا مكنتش موالية أصلا للسيسي، وبيعزز الفكرة دي عندي وجود ناس زي أبو الفتوح والهلباوي ومختار نوح اللي وصلوا لأعلى مناصب داخل الإخوان، واكتشفنا فيما بعد فقط أنهم مجموعة من "الخونة" فيا ترى مين لسة موجود مكتشفناهوش لسة؟؟".

وطالب المغير في تدوينته بإنهاء سيطرة التحالف ومقاطعته ومحاصرته شعبيًا وثوريًا، وهدمه تمامًا وتعريته هي الخطوة الأولى نحو الحفاظ على الثورة، قائلًا "خنجر واحد في ظهرك أسوأ من عشرات السيوف على صدرك، التحالف مخترق".