تصريحات عبير صبرى عن «غسل رِجل» حبيبها تشعل «فيس بوك».. سميح: اتعلموا منها يا بنات مصر.. سامر: هترجع الست أمينة تانى.. سماح: يعنى إيه أغسله رجله؟.. برديس: لو عاملنى كملكة هاكون له

أشعلت تصريحات الفنانة عبير صبرى، خلال لقائها مع الإعلامية هالة سرحان، موقع التواصل الاجتماعى «فيس بوك»، لتواجه انتقادات وتأييدا من قبل جمهورها، بعد أن كشفت عن استعدادها لـ«غسل رجل» من تحبهم من الرجال.

وأضافت عبير صبرى: « أنا مستعدة كمان أعملهم باديكير وأكلهم بايديا». وهو ما أثار موجة ساخرة من ناشطات فيس بوك فى حين وافق النشطاء على ما قيل وقارنوا بينها وبين المرأة فى حياتهم.

يقول سميح عزمى: مبناخدش منكم غير عاوزين فلوس ومش قادرين نكمل كده ولازم تساعدونا شوفوا الستات بتعمل ايه واتعلموا.

فيما سخر محمد السيد قائلا : فنانة وبتغسل رجل جوزها أو اللى بتحبه ..غسلتى رجل كام واحد ياشاطرة؟

وأكمل سامر أيوب :أنا أرغب بشدة فى فتاة مثلها تحبنى وتدللنى كما كان يحدث قديما مع "سى" السيد فأين أمينة الآن ..أين اختفت؟

بينما اعترضت الناشطات :

تقول سماح رجب: يعنى إيه أغسله رجله هو أنا لو راجعة من الشغل تعبانة هيجيب الطشت ويغسلى رجلى ولا هى منظرة على الفاضى.

بينما احتدت برديس إبراهيم قائلة: لما ألاقى الراجل اللى يعاملنى كملكة أكيد هعامله زى سى السيد مش أكل ونوم وإحنا اللى بنتعب والآخر عاوزين يتدلعوا ليه هو إحنا ملايكة نتمرمط وندلعكم.

وأضافت رحاب بهجت أن الرجل لا يريد منها هى وبنات جنسها سوى المتعة والاهتمام فى المقابل لا يقدم شيئا لراحتها فلماذا تقبل بهذا الأمر.