" يا ليل " قصديدة جديدة لـ" أمين حداد "

يا ليل كأنك نهار في غاية الإخلاص
حاطط سواد على شمسك
يا ليل يا عايش في أمسك
ليه النجوم ترتعش لما الشهيد لمسك
يا ليل يا مينا...
يا ليل يا دانيال..
وفيه عيال... ماتوا... من غير ما ييجى قصاص
ماشى في شوارعك يا ليل... بالمّ فارغ رصاص
تنفع دليل البراءة وتنفع دليل القتل
تنفع كمان عليقات على مرايات النقل
تنفع ميدالية بتخبط.. ركبة اللى يسوق
يا ليل دموعى ندى وأبو الشهيد مخنوق
يا ليل يا حافظ دمائى
يا راسمًا شهدائى
شهيد في خامسة ابتدائى
وشهيد في تالته حقوق
....
يا ليل وانت الصديق اللى ما اتكلمش
لكن بتسمعنى
انت اللى شاهد على المجانين
مجنون يا ليل زيّك
يا ليل يا ليل.... إزيّك؟.