بالفيديو.. والدة الشهيد إسلام: «عرفت ابني من حاجبه ورجليه»
أكدت والدة الشهيد إسلام عبدالمنعم بدر محمود والمقيمة بمحافظة أسيوط أنها تعرفت على جثمان نجلها من خلال حاجبه ورجليه.
وقالت: "حسبي الله ونعم الوكيل في اللي عمل كدة في ولدي عايزاهم يدوقوا المرار اللي أنا شفته.. أنا ولدي اتلميت عليه ويارب اللي عملوا فيه كدة أهليهم ميتلموش عليهم".
وأضافت: "لما شفته مكنش هو بس رجليه هي وابني جسمه جامد وطويل والجثمان اللي جابوه صغير الحجم، بس كنت متخيلاه من رجليه وحاجبه هو اللي شدني ليه".
وتابعت: "دفناه بعد فجر اليوم الإثنين.. وكنت بشوف اللي في التليفزيون يبكون على أولادهم وحرقة قلبهم وأدعي وأقول يارب لا توريني اليوم دة.. متحطنيش يارب في اليوم دة.. وقلبي اتحرق ذي اللي كنت بشوفهم في التليفزيون".
وكانت والدة الشهيد رفضت تسلمه مساء أمس الأحد، موكدة أنه ليس ابنها وتم التحفظ على الجثمان بمستشفي الإيمان بمحافظة أسيوط لمدة 6 ساعات وأخذوا والدته وأهله من منزلهما بجوار المسجد الكبير بحي غرب أسيوط إلى مستشفى الإيمان وشرح لهم أحد الأطباء أن حالة الجثة تتغير كل 6 ساعات وأن التغيرات التي بالجثة من جراء الرصاص والنيران وبعد إقناعهم بأن الجثة لابنهم تم دفن الجثمان بمقابر أسرته بعرب المدابغ.
وكانت أنباء ترددت عن أن هناك تبدلا في الجثامين عن طريق الخطأ وأن جثمان شهيد أسيوط متواجد بمحافظة أسوان وأن شهيد أسوان متواجد بمحافظة سوهاج.
