"سطوطة الفنجري" تضرب الودع وتقرأ الطالع لـ"وزير التموين"

أبين زين.. وأقول على المستخبي واللي مش معروف.. وأضرب في ودعي.. وتملي بدعي.. والمستخبي بقوله ع المكشوف..

يا وزارة التموين.. قولي للوزير كان يؤجل تسعيرة البنزين.. كان انتظر لما رمضان ينتهى بيومين.. وبعدها يبقى يرفع سعره للطالبين.. لأن كله استغل الفرصة قالوا آمين.. ورفعوا سعر السلع بدل الجنيه جنيهين.. واحنا في شهر الصيام والعيد وراه يا معين.. وحنعمل إيه واللا إيه ومين يسد الدين.. ونجيب منين الفلوس واللي معاه قرشين.. عامل حسابه على الهدمة وع الرغيفيـن.. يبقى القرار ندرسه ونحدد الموازين.. ونصدره في وقت يبقى الكل فيه عارفين.. إيه اللي مطلوب نناقشه بكل المضامين.. ونقنع الناس بمضمون القرار الزين.. وأظن كل اللى قلته يعرفه القاعدين.. على الكراسى في منصب اسمه مستشارين.. ومفيش لزوم كل حبة تصدروا قوانين.. تعمل لنا هيصة فاضية واحنا مش ناقصين.. الطبالين اللى في وسط الميدان واقفين.. يطبلوا ويهتفوا بأنهم رافضين.. ونفسهم يرجعوا للكرسي منتصرين.. علشان كده مفترض فيه للقرار موازين.. ونفسنا ندرس المواضيع بدون تخمين.. وودعى بيقول لكل وزير يانور العين.. خد القرار الصحيح بشجاعة الواثـقين.. ويكون مناسب في وقته لصالح الملايين.. وما تزعلوش من كلامى بلاش بقى تفانين