ألوان
ألوان
ولون الدم
كان سايل على مرايتى
وكوبايتى اللى بتغنى
برغم الشرخ جواها
وكان لازم
حنين الصمت يدارى
دموع الفجر
تتفاعل مع يِأسى
وكان نفسى
أشوف أصنام بتتكسر
بفاس مرسوم في كراستى
لكنى لقيت ألم حالف
ليتشعبط على كتفى
ولون الدم متحنى بحبة رمل
اناديلها
و أقول أمى فتحضنى
تنسينى رحيل النور
وكان موجود قابيل تانى
وشايل ذنبه فوق كتفه
وكان الدم بيسقط
برغم أنى بقالى كتير
وأنا باكتب
ومش هاقدر
أذوق حلمى بالفوضى
وليه أرضى
ادادى الخوف بمصاصة
وكراسة تسع تسطر
واذق في أيده
واتحايل عليه يكتب
وداع مش جى هنا تانى
فيعرف أنى مش سهلة
وليه أمشى في وسط النار
ومين يقدر ينجينى
يرجعنى ويحيينى
ويرسمنى شعاع من نور
ويكتب سر تكوينى
