شلاطة اشتغل محلب بتاع البرايز
يلا لموا الأجرة مع بعضيكم كده يا بهوات..
خد يا أسطى 14 نفر من العشرين وابعت 6 جنيه.
إيه ده يا نجم.. أنت بتدينى إيه ؟!
كل نفر دفع جنيه يا أسطى أهوه.. مالك متشنج ليه هي دى مش أجرتك؟
هأووو.. أجرة مين يا كوتش.. أنت ماسمعتش قرارات إمبارح ولا عديت بعربيتك على بنزينة ولا إيه؟
قرارات إيه يا عم.. أنا لو عندى عربية كنت ركبت معاك أصلًا؟
البنزين والسولار والغاز أسعارهم رفعت من جديد.. والأجرة بقت جنيه ونص.
هو القرار ده مش السيسي كان أجله لبعد العيد علشان محدش ينكد علينا وقال لنا إن رمضان كريم؟
آه.. رمضان هو اللى كريم مش محلب يابا..!
ولو يا أسطى.. الزيادة في الأسعار مش تخليك تدفعنى 50 % فوق الأجرة القديمة.. محلب اجتمع بكم أول إمبارح واتفق معاكم إن الأجرة هاتزيد 10 % بس على الخطوط الداخلية.. تقوم أنت عاوز تزودها 50 % على خط سرفيس تعبان من المطرية للمظلات؟!
ههههههههههه.. قصدك الاجتماع اللى عمله مع الواد شلاطة بتاع خط الزاوية عتبة.. ده واد اشتغالة ويضحك على الحكومة كلها يابا.. أنت عاوز تقول لى إن رئيس الوزراء مش عارف إن البرايز إتلغت من زمان.. حتى الربع والنص والجنيه الورق محدش بيتعامل بيهم؟
فهمنى بقى يا أسطى علشان أنا فهمى على قدى..!!
قصدى إن محلب لو بتاع برايز كان قال لكم كل واحد بدل ما يدفع جنيه أجرة.. يطلع لى جنيه وبريزة.. قِب بقى منك له بالجنيه ونص علشان نمشى وتروحوا شغلكم..!!
طيب يا أسطى لو حقك بريزة.. الأربعين قرش الزيادة تاخدهم ليه؟
لامؤاخذة يا باشا أنت شكلك لمض حبتين مع أنك محترم.. بس لو معندكش شغل استنى معايا ساعة الضهرية كده وشوف بيروحوا لمين.. شوف الباشوات اللى بيبلطجوا علينا ويلموا السبوبة.. ولا هجامة الطريق اللى بيدفعونا جوز جنيهات على كل دور مع أننا بندفع كارتة كل 3 شهور للمحافظة بالشيء الفلانى.. فكرك كل دول هايبقوا فيفى ونانى معانا لما يسمعوا إن الحكومة رفعت الأسعار.. هايجيبوا قوتهم وكيفهم منين يا عمنا.. أنت شكلك غلبان أو بتستعبط علينا.
-إمسك يابا أجرتك أهيه.. والنص جنيه بتاعى أهوه.. ولِم أجرتك من الناس.
عارف يا باشا القرار ده معناه إيه عند الحكومة اللى أخدته؟
إيه يا أسطى.. قول لى أنت عارف إن أنا ماأجيش حاجة في دماغ محلب بتاع البريزة..!
القرار ده مستحيل حكومة تاخده إلا لو عارفة إنها ناوية تخلص من الثورة وترجع ريما لعادتها القديمة.
وإيه كانت عادتها القديمة يا أسطى؟
اللى مش لاقى تمن الركوبة والبنزين والكهربا والغاز والحاجات التانية اللى هاتغلى بسببهم.. هايفسد وياخد رشوة ويرجع الفساد تانى.. ويرجع معاه كل برغوت على قد دمه يابا.. وترجع فتاوى الاكتفاء الذاتى بالإكراميات والأدراج المفتوحة والحلاوة.. فكرك أنت إن الحكومة مش فاهمة إنها لو عاوزة تموت ثورة تبقى لازم تفسد شعبها وتنسيه فلوسه المسروقة هنا وهناك؟
للدرجة دى..!! أنت فعلًا ممكن تكون بتتكلم صح.. بس دى حكومة بتصحى 7 الصبح والرئيس قال لنا إننا نور عنيه..!!
طبعًا.. بس بتصحى تلم الغلة.. وعلشان إحنا نور عين السيسي فإحنا غاليين وكان لازم يرزعنا قرارات قشطة على قد مقامنا عنده.. إحنا مش أقل عنده من فواتير الغاز والكهربا وصفيحة البنزين يا كبير.
طيب نزلنى على جنب يا أسطى.. عند محطة المترو.
أنت رايح شغلك بالمترو مش بالعجلة زى الكبير ما قال؟؟
لأ يا أسطى.. أنا رايح أفك برايز علشان أحاسبك بيها بكرة على الأجرة زى محلب ما قال.. ولو فتحت بقك معايا هاجيب لك شلاطة.
