سطوطة الفنجري تضرب الودع للرئيس!
- أبين زين.. وأقول على المستخبي واللي مش معروف.. أضرب في ودعي.. وتملي بادعي.. والمستخبي باقوله ع المكشوف.
مبروك مبروك لرئيسك يا مصر.. اللي بحرْصه عليكي بيثبت إنه مناضل فاق الحصر.. عمره ما فكر يوم في الكرسي ولا يوم قال أنا عايز قصر.. لكن فكر في رغيف ناسه ساعة النصر.. قال للعالم كله يا عالم اللي يفكر يضرب شعبه حاعصره عصر.. حتى الشعب المصري بانتفاضته.. غير مجرى نظر العصر.. كل العالم بعد ما شافه وسمع صوته قال للدنيا هي دي مصر.. بس أنا عايز أقول لك كلمة يا مصر في ودنك.. إحنا بدأنا طريق المجد.. لازم نثبت للكون كله.. شعبك باني هرم السد.. ومافيش حد يقدر ينسى وقفة جيشك ساعة الجد.. لكن كل العالم واقف عايز يسأل.. فين إنتاجك بعد نضالك.. محتاج رد.. يخرس كل لسان الفوضى.. يوم يرتد.. قلتم إيه يا شباب الثورة عايزين نبني.. واللي يطق يا روحي يطق.. واللي في نفسه يطلع يخطف ثورة بلده.. أحسن حاجة يخش الشق.. علشان مصر الحرة حتفضل.. رافضة الزق.. م الداخل أو حتى الخارج.. قالوا نوافق أو قالوا لأ.. يللا يا ريس شق طريقك.. جرس النهضة لشعبك دق.. قول لنا إنت حتعمل إيه.. قول والله حاقول الحق.
