"يا مصر صالحى شبابك" شعر لـ "محمد عاطف عبد المنعم"

يامصر صالحى شبابك
يامصر إيه اللى صابك ؟
ياقلب أم طيب
ولادك عاشقين ترابك

أتارى الدم كان كافى
صبحتى منهم تخافى ؟
شبابك بقلب صافى
بيضحوا عشان جنابك

ظلمتى جيل أصيل
قولتى خاين عميل
إزاى ف عتمة ليل
تساوى عدوك بأحبابك

غريبة ضحكك يبكى
وحبك نار بتكوى
بتشكى منهم وتحكى
ولا مرة شكوا من عذابك

يا دوله شابة للعواجيز
سحروا عنيها بالأباليس
والكل طمعان يبقى عريس
من غير ما يدق على بابك


إوعاكى تقولى إنه خرب
أو فاتك هرب متغرب
عملتى إيه لجل يقرب
كالعادة فرحانة بغيابك

خاوى اللى كبر داديه
وان يوم مرض داويه
عن حرك وبردك داريه
دا لا سبك فيوم ولا عابك

لملمي حضنك براح
عوضي كل اللى راح
بيهم شدتك تنزاح
دا ياما علوا ف رحابك

اغزلى التوب اللى رقع
ودفى القلب اللى سقع
ليروح لغيرك ويركع
ونندم لجل أنه سابك



يامصر صالحى شبابك
يامصر إيه اللى صابك ؟
ياقلب أم طيب
ولادك عاشقين ترابك
ولادك عاشقين ترابك