"الخلا ..." للشاعر حمدى زيدان

من اجواء القصيدة
باترعِش ..
جوايا كام سؤال حرّاق ، ودمعتي قريبه
عندي سته وعشرين غزاله هربت
والغول اللي اسمه الوحده مونسني
لسه الشمس اللّعبيه بتستناني ع آلإمه
وتحرضني أسيب المدرسه/الورشه/المحكمه/القهوه
واسرح معاها أشرب سجاير
واصطاد عصافير البنات من حبال الغسيل
لسه مستعيل مرايتي
لما أقعد أتنطط عشان عين بت منهم استنتني ومانطفِتـش
دمعتي مِسقا للنورس
عاوز أقول آيّ ، واحلّ جسمي م الحاله الصلبه
فيها إيه لو شَبكْتني ف ريحة البت ... وفَـلـَتْ
لازم أرجع الساعه واحده عشان ملقانيش
شبعان جوع ، والحصان اللي متعلق في رقبتي بينفر
البحر أحلى غنيوه لسه مستني زي حبيبته .. هي اسمها إيه؟
مش لازم تسمع فيروز .. بس لازم تكون بتحب اسكندريه
منها لله اللي نكشت ضفيرة الحزن ... وزوغِت
باكرهها بنص قلبي ونصه التاني بيتلفت لما تعدي سيرتها
أنا قلبي مش مصطبه ، تستنى البنات عليه العيال الهربانين من ثانوي
ومش عامود نور ، مش عارف يوقف العربيات عشان يعدّي
كل الحكايه ..
النخل كل ما اروح أغني
يداري وشه ويخبي دمعه .