سطوطة الفنجري تبين زين وتضرب الودع للمشير السيسي!

- أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف
أهلا وسهلا يا سيسي انت لينا ونيس..لكل مصري في وقت الشدة والتدليس..أنا شفت كرسي الرياسة لك ضحك وأنيس..بعد انتخاب حر صادق بعده تبقى جليس..على كرسي عرش البلد يا منتبه وحريص..وحتشاركنا في أوضاعنا وتبقى رئيس.. ومصر تبقى العروسة وانت تبقى عريس.. وعصر نهضتنا تبدأ انت له تأسيس.. ولكل أبوابنا مصر حتفتح الترابيس..وجيشنا واقف شجاع كالسد ويَّ بوليس.. ضد اللي فكر بغدر يكون لنا إبليس..
صدقني ودعي ورملي يبشروك بالخير..ويقولوا إنك لمصر يا سيسي كنت نصير..وإن عقلك وفكرك خطة للتغيير..ولغة حوارك بتعجب ناس غلابة كتير..عارفين بأنك حتبقى لحلمنا التفسير..وخلي بالك بأن الشعب عنده ضمير..مع كل واحد وقف جنبه في وقت خطير..وأظن يوم وقفتك مع ثورة الجماهير..كانت يا سيسي النجاة من الوقوع في البير..والشعب عمره ما ينسى كل صعب عسير..ويقف مع اللي وقف وياه بدون تقصير..
ومن هنا كلنا عايزين نقف طوابير..ونقول نعم للي كان صادق وذوق وأمير..علشان نعوض سنين ضاعت بدون تغيير..فشد حيلك بقى يوم انتخابنا ح أطير..وأقول يا مرحب يا سيسي النصر له تباشير..والشعب طول عمره كان حسن السلوك والسير..وأنا قلت لك انت عند الشعب كنز كبير.