تعليم "صنع في مصر"

عزيزي القارئ... بعد التحية والسلام

كتير بنسمع جملة "التعليم المصري فاشل.. لكن مسألتش نفسك قبل كده إيه أسباب فشل التعليم ؟؟ والفشل فين بالظبط ؟؟ وإزاى نعالج الفشل ده ؟؟

لما دخلنا الابتدائي زمان واحنا صغيرين كان نفسنا نتعلم حاجة تفيدنا في حياتنا لكن للأسف اتعلمنا أناشيد وأغانى ولعب وحاجات ملهاش أي فايدة في المستقبل وحتى الدروس اللي كانت مقررة علينا مكناش بنفهم منها حاجة ومكانش أصلا مطلوب مننا إننا نفهم لأننا كده كده هيغششونا في الامتحانات وهننجح.. ودي كانت بداية الفشل بالنسبة للطالب المصري..

ولما كبرنا شوية ودخلنا الإعدادي قولنا خلاص بقى الواحد لازم يذاكر ويفهم ويلاقي نفسه لأننا كبرنا خلاص ولكن مع أول امتحان دخلته ولقيت إن كل اللي طلع من الأوائل دول من الناس اللي بتدفع تبرعات، اكتشفت أنى استحالة أبقى الطالب المثالي اللي بيفهم ويذاكر وضيعت سنين الإعدادي من غير ما أتعلم أي حاجة..

كبرنا شوية والعقلية اتطورت ودخلنا الثانوي ودي المرحلة اللي المفروض إنها بتتحكم في مستقبلك وكنت فاكر إنها مرحلة هيبان فيها الذكي والغبي كنت فاكر إن دي هي مرحلة التمييز بين الطالب المحترم اللي عايز يتعلم والطالب اللي كان بينجح بسبب التبرعات بس اكتشفت إن الثانوية دي كمان كلها فساد.. بمعنى إنه لو الحالة السياسية في بلدك مرتاحة يبقى الامتحانات والتنسيق مرتاحين إنما لو غير كده يبقى أنت هتضيع سنين الثانوي على قلة فايدة ومش هتكسب حاجة وده للأسف اللي تقريبا حصل..

بغض النظر عن الثانوى واللي كان بيحصل فيه بس الشهادة لله أكتر مرحلة اتعلمت فيها بجد هي الثانوى ،، اتعلمت إزاي أهرب من المدرسة واتعلمت إزاي أبقى بجح مع المدرسين واتعلمت حاجات كتير لا تعد ولا تحصى بس كان عندي مبدأ ماشي عليه هو إنى هادخل الجامعة وهرتاح بقى وهأطلع كل اللي جوايا

وشاءت الأقدار إني أنجح الحمد لله وبمجموع كويس ودخلت كليه تجارة..

واكتشفت الصدمة في الكلية إنها عبارة عن مجتمع يعيش فيه فقط الناس اللي عندها فراغ.. والدكتور بيعاملك على إنه إله ومفيش حد يقدر يعارض الدكتور أو يختلف معاه في الرأي وطبعا الدكتور بينزل الكتاب ويقولك يلا ياوحش تعامل مع نفسك بقى أشوفكم في الامتحانات.. وطبعا اللي بينجح ده بيبقى لازم اشترى الكتاب بتاع الدكتور أصله يعنى مش هينجحك كده لوجه الله..نيجى بقي لحال الطلاب في الكلية ودول أنا بسببهم كرهت الكلية كلها عارفين ليه ؟؟ كنت أدخل الكلية مش شايف أي حد جاي يتعلم إنما كل اللي شايفه هو عبارة عن شباب فاضيين عايزين يظهروا نفسهم قدام البنات.. وبنات جاية تدور على عريس مش جاية تتعلم.

نهاية الكلام أيها السادة المشكلة مش في التعليم.. المشكلة فينا إحنا..إحنا عايزين ثورة على النفس عايزين نغير من نفسنا.. وكالعادة العنصر البشرى لما بيدخل في أي حاجة لازم هتفشل وبالتالي بعد ما دخل العنصر البشرى في التعليم للأسف انهار.