بالفيديو.. عمرو أديب لـ«باسم يوسف»: «لو ما اتريقتش عليا هزعل»
أكد الإعلامي عمرو أديب، أنه «لا يغضب من سخرية باسم يوسف في برنامجه»، مضيفا: «لو فيه حلقة باسم مش جايبني فيها هازعل».
وقال «أديب»، خلال برنامجه «القاهرة اليوم»، على قناة «اليوم»، مساء الإثنين: «الراجل بيقول كل اللي هو عاوزه لو فيه حاجات بيشيلها ده موضوعه هو، وأنا مهتم إنه يقول اللي هو عاوزه، والناس تقولي ما بتزعلش من اللي بيعمله باسم أرد أقول لاء، وأقول لو فيه حلقة باسم مش حطط لي حاجة أزعل، هو ده الإعلام هو يقول وانت تقول زي ما أنت عاوز».
وتابع: «ده برنامج ساخر ولما البرنامج اتقفل قعدت الجرايد تقول حكم العسكر والقبضة الحديدية، ولما رجع واتكلم محدش عبرنا، ولما باسم حلقاته التلاتة الأولى تريقة على كل الناس الكبار في الدولة محدش قال البلد دي فيها ديمقراطية، إنما إحنا بينا وبين بعض عارفين إن باسم بيقول كل حاجة ما عدا اللي عاوز يشيله وده حقه جايز يضطر بعد ما بيشتغل ببقى عاوز يشيل حاجات».
