نشطاء السوشيال ينصحون طلاب الثانوية العامة: النتيجة مش هتحدد مستقبلك
"دموع للفرح وأخري للحزن" هذه حالة كل أسرة مصرية اليوم، لديها أبناء في الثانوية العامة، مع إعلان نتيجة الثانوية العامة اليوم، لكن نشطاء مواقع التواصل الاجتماعي قدموا نصائح لطلاب الثانوية العامة الذين اجتهدوا ولم يحصلوا على النتائج التي كانوا يرجونها.
نتيجة الثانوية العامة 2022
"لا تدع الثانوية العامة تحدد مستقبلك"..هكذا نصح النشطاء طلاب الثانوية العامة، مؤكدين أن مجموع الثانوية العامة ودخول كليات القمة ليست هي المقياس للنجاح في الحياة، وطالبوا كل من لم يتفوقوا في الثانوية العامة ولم يحققوا ما يتمنوه، لكنهم اجتهدوا ألا يفقدوا الأمل، وأن يرضوا بقدر الله، وألا يتنازلوا عن حلمهم في الحياة.
وقالت الفنانة والبلوجر رانيا يحيي تجربتها لطلاب الثانوية العامة قائلة: "مبروك لكل ثانوية عامة اللي جاب مجموع كبير واللي جاب مجموع صغير واحب اقولكم المجموع مش نهاية الدنيا ولا مكتب التنسيق نهاية العالم، انا واحدة من الناس مجموعي ما جابليش غير حقوق وقررت اغير قدري وادرس اللي بحبه وبالفعل درست ادارة اعمال (تخصص تسويق واعلان) واشتغلت وانا بدرس عشان اساعد في مصاريف الجامعة لاني كنت شايفة ان ده قراري ومسئوليتي واتخرجت بتقدير كمان واتخرجت اشتغلت في شركة تأمين عالمية بدون واسطة تمامًا من بعد شغلي فيها ٥ سنين دخلت مجال الميديا والحمدلله نجحت وعملت اسم كويس جدًا الحمدلله في اكتر من فرع من فروع الميديا.."
ونصحت رانيا يحيي الطلاب قائلة: "صديقي العزيز المؤلف محمد سيد بشير مؤلف ليه اسمه واعماله الناجحة اللي كسرت الدنيا اللي اهمها انه اول مؤلف مصري يبقى مؤلف لمسلسل امريكي، محمد كتب اكتر من مرة ان مجموعه في ثانوية عامة لم يتخطى ال ٦٠% ولو انا فاكرة صح كمان غالبًا المجموع ده كان بعد الاعادة.. الإبداع مالوش علاقة بالمجموع ابدًا شوف انت بتحب ايه واشتغل عليه.."
نصائح وتجارب الثانوية العامة
ووجه طارق رافيع، محاضر في إدارة الجودة في الأكاديمية العربية للعلوم والتكنولوجيا والنقل البحري، نصائحه لطلاب الثانوية العامة قائلًا: "النجاح المهني مش مرتبط بمجموع ثانوية عامة ولا نوع الكلية، النجاح المهني هو أن تتميز في المجال الذي سوف تتخصص فيه أيا كان، والنجاح المهني ليس هو كل النجاح، النجاح هو التوازن مابين حياتك المهنية والمادية والنفسية والاجتماعية والروحية، أي تقصير في أى جانب منها يجعل الإنسان لا يشعر بأى نجاح في الحقيقة، لذلك الثانوية العامة بمجموعها ماهي إلا خطوة في رحلة طويلة، فلا توقف حياتك عندها."
وتابع طارق قائلًا: "فالثانوية العامة ليست نهاية المطاف، الحياة مليئة بالفرص، والتعليم لا علاقة له بالرزق، فأغلب مالكى المرسيدس والبى إم ليسوا أطباء ولا مهندسين، أغلب سكان الكمبوندات الفارهة تجار، الرجل الذى غالبًا ستشترى منه شقتك المستقبلية لا يجيد القراءة والكتابة وغالبًا سيكون مقاول بدأ كعامل بناء ثم جاء الفتح عليه بعمارات، رؤساء مجالس إدارة الشركات العالمية ذا مؤهل عادي، فزاعة الثانوية العامة التي يعيشها المصريون هي أحد أكبر الخدع العقلية في الزمن المعاصر.."
نتيجة الثانوية العامة
أما نصيحة محمد صلاح لطلاب الثانوية العامة الذين لم يحالفهم الحظ فقال: "صدقني يا بطل نتيجة الثانوية العامة مش نهاية المطاف صدقني مستقبلك مش متوقف علي درجة في الشهادة صدقني إن ياما طلبة دخلت كليات قمة واشتغلت في مجالات تانية بعد كده طالما عملت اللي عليك سيب الباقي علي ربنا.. ربك كريم ايًا كانت نتيجتك احمد ربنا عليها وخليك راضي باللي ربنا كاتبهولك لان أمر المسلم كله خير وربنا دائما مش بيختار غير الاحسن ليك.. في حاجات بتبقي في ظاهرها شر للإنسان بس بيكون في باطنها كل الخير صدقني لو لاقدر الله مجموعك ماكنش المجموع اللي انت كنت بتحلم به خلي عندك رضا وقناعة إن ربنا كاتبلك الخير"
حكي باسم الشيخ مفارقة غريبة عن نتيجة الثانوية العامة: "زى النهاردة من ٢٠ سنة كنت على أحر من الجمر في انتظار نتيجة الثانوية العامة وطبعا منمتش طول الليل من التفكير، على الساعة ١٠ صباحا فوجئت باتصال تليفونى من شخص ما بيقولى إنه وزير التربية والتعليم فقلت أنت مين بطل هزار قالى والله مكتب وزير التربية والتعليم مش أنت الطالب فلان الفلانى ثانوية عامة قلتله أيوة أنا، صباح الوزير ياسعادة الخير فشطحت بخيالى وتوقعت أننى من الأوائل على الجمهورية والوزير بيبلغنى الخبر بنفسه والزغاريد ملأت البيت، فجأة الوزير قالى أنت رقم جلوسك ٥٧٦٢٥٤ قلتله آه قالى طيب معاك رقم تليفون زميلك اللى كان قاعد وراك اسمه..... ورقم جلوسه ٥٧٦٢٥٥ هو المركز الأول ومش عارفين نوصل لتليفونه"
حكايات مع الثانوية العامة
وعن حكايتها مع الثانوية العامة قالت إيمان عليم " بمناسبة الضجة بتاعة الثانوية العامة اللي بترعب كل بيت، انا معيش ثانوية عامة! اشتغلت باحثة واستاذ مشارك في اكبر جامعات ومعاهد البحوث في السويد وامريكا والمانيا والآن استاذ عامل ومعيش ثانوية عامة ولا عمري اخدت درس واحد خصوصي في حياتي، اه والله !!! أمال معايا ايه؟ معايا شهادة بريطانية معادلة كنت بعملها جنب حضوري المدرسة الثانوي عادي، مش متفرغة لها نهائيا! زمان لم تكن الشهادة المعادلة ري دلوقت لازم تختارها من بدري وتخلصها في ثلاث سنين زي ثانوية عامة، كنا بنروح نحضر الدروس بعد الضهر في مدرسة فكتوريا لمدة ترمين اتنين فقط و احيانا نروح الجمعة، يوم اجازة المدرسة العادية! الشهادة كانت شكلها زي اللي في الصورة"
وقالت "الخلاصة: الثانوية العامة مش مفروض تحدد مستقبلك ولا تكون نظام مرعب، هي مرحلة ولازم نظام الرعب ده وتكاليف الدروس الباهظة ده يتغير"
أما علي الغريب فوجه نصيحته قائلًا: "طلاب الثانوية العامة وأهاليهم أحسِنوا إستقبال قدر الله وإختياره فالدنيا مليئة بسعداء وعظماء ليسو مهندسين ولا أطباء"
وقالت شيرين محمد " بمجرد إعلان نتيجة الثانوية العامة هتدخلوااا اختبار ثانى وهو الرضا بقضاء الله تعالى وقدره، الاختبار دا النجاح فيه أهم من حصولكم على أعلى المجاميع، مهما كانت النتيجة تقبلها بالصبر والرضا واعلم انه الخير لك، فرب الخير لا يأتي إلا بالخير"
