أول رسالة للمطرب «أسامة الهادي» من داخل محبسه بعد القبض عليه
نشرت الصفحة الرسمية للمطرب الشاب أسامة الهادي، أول رسالة له من محبسه بعد القبض عليه منذ أربعة أشهر، بتهمة الانضمام لجماعة إرهابية.
وجاء نص الرسالة كالتالي: «الأربعاء 4 يوليو عيد ميلاد أسامة الهادي.. كنا بنتمنى نحتفل بأسامة وسطنا، لكن هو للأسف بيقضي عيد ميلاده في الحبس، وتحديدًا اليوم جلسة من جلسات التجديد اللي أسامة دخل دوامتها من أربعة أشهر على ذمة التحقيق، والتهمة الانضمام لجماعة إرهابية، ودي رسالة من أسامة كتبها في محبسه هتعرفكم أكتر على الحكاية».
وأضافت: «اليوم جوه السجن وأنت مظلوم بيعدي كأنه سنة، سواء كنت تعرفني أو متعرفنيش، أرجوك ادعيلي.. بسبب أن رامي عصام نزل أغنية ضد النظام أنا مليش صلة أو علاقة بيها، أنا محبوس على ذمة التحقيق ومتوجهلي تهمة انضمام لجماعة إرهابية وده كله بسبب إني من تلات سنين رامي طلب مني إني أضبط له شوية حاجات على الصفحة بحكم شغلي ك social media specialist وخبرتي في إدارة وتسويق الصفحات وعلاقتي المباشرة بفريق دعم فيس بوك، وخلاني واحد من الأدمنز على الصفحة علشان أقدر أعمل ده»،
وتابع «الهادي» في رسالته: «ده اللي حصل وبيحصل مع فنانين كتير سواء في وسط الفن المستقل أو خارجه، وبرغم أنه الناس التانية اللي معايا في القضية قالوا في محاضر التحقيق أنه مليش أي علاقة بإدارة الصفحة، وبرغم أن اسمي مش مكتوب على الأغنية، وإن علاقتي برامي عصام نفسه مقطوعة من سنين، أنا لسه محبوس».
وأضاف :"حالتي الصحية بتسوء يوم عن يوم ونفسيتي أسوأ وأسوأ، وتقريبا خسرت كل حاجة فنيا وماديا.. ادعولي.. حاولوا تساعدوني.. ومتنسونيش".
وأكدت الصفحة في نهاية بيانها أن أسامة الهادي لا ينتمي لأي فصيل سياسي ولم يشارك في أي أنشطة سياسية قبل كده قائلة :«بنتمنى من جميع متابعيه ومحبيه دعمه وبنطالب الجهات المختصة النظر في قضية أسامة وموقفه الواضح وإخلاء سبيله علشان يقدر يكمل حياته ويتابع مشواره الفني اللي يادوب بياخد فيه أول خطواته، واحنا كلنا عيلة أسامة وأهله وأصحابه عندنا يقين في حق ربنا وعدله ورحمته".
