أحمد أمين يخرج عن صمته ويتحدث عن أزمته مع النهار بسبب «البلاتوه»
خرج الإعلامي أحمد أمين عن صمته وتحدث للمرة الأولى عن أزمة برنامجه "بلاتوه" المذاع على قناة النهار.
وقال عبر صفحته الشخصية على موقع التواصل الاجتماعي "فيس بوك": «برنامج البلاتوه وقف.. والحلقات المعروضة حاليا حلقات معادة.. وداخلين على سنة كاملة تقريبا ما عملناش حلقات جديدة.. توقف البرنامج كان بسبب قرار من قناة النهار لتعرضهم لبعض المشكلات المالية والتفاصيل أنا مش عارفها.. للأسف ده ترتب عليه حاجات كتير».
وأضاف: «أولا: اعتذرت عن كل الشغل اللي كان ممكن أعمله عشان عايز اتفرغ للبرنامج وكانت القناة بتوعدنا كتير إننا راجعين لكن كلها كانت وعود وبس والله يعينهم على التحديات اللي هما فيها.. فبقيت قاعد في البيت مكبوت عندي حاجات عايز أقولها ومش عارف.. ولأني متعاقد مع القناة ماليش حق إني أشتغل في قناة تانية».
وتابع «أمين»: «ثانيا: القناة بدأت تنزل إعلانات على المحتوى القديم بطريقة مسيئة جدا للمحتوى.. وطبعا أنا اعترضت كذا مرة وما فيش فايدة.. فابتدت توصلني تعليقات سلبية من ناس ليها كل الحق تزعل لأن أنا شخصيا منزعج وبقيت ما بحبش أشوف صفحة البرنامج ولا فيديوهات البلاتوه طبعا مع كل الاحترام للإعلان نفسه وللمعلن لكن إنك تقطع عمل فني وتحشر فيه إعلان بالشكل ده.. عيب».
واستطرد: «ثالثا: كل يوم ناس كتير بتسألني البلاتوه فين.. وأنا ما كنتش عايز ارد احتراما للقناة اللي كانت سبب في ظهور أول برنامج تليفزيوني ليا.. بس أنا كنت ساكت طول الفترة اللي فاتت عشان فيه ناس من فريق العمل ليهم مستحقات مالية ولسه لغاية النهارده ماخدوش فلوسهم (وانا منهم) فكنت اتمنى اننا نرجع نشتغل لكن يبدو أن مافيش فايدة».
وأضاف:«أنا ممكن اتحمل كل المشكلات السابقة إلا أن الناس تبدأ تزعل من محتوى أنا تعبت فيه عشان يسعدهم ويرضيهم».
واختتم الإعلامي قائلا: «ادعو لي أعرف أرجع أقدم اللي كنت بحبه زي ما كنت.. وأشكركم على صبركم علينا.. وبعتذر عن كل إساءة أو تأخير ياريت القرار كان في أيدي.. لكن ما باليد حيلة.. وربنا يكتب لنا رزقنا في فرصة حلوة جديدة اعرف أعمل لكم حاجة تسعدكم».
