هناء نوار تكتب: «كَرهت الشعر»

كَرهت الشِعر والشُعَرا
وناس بِوشوش كمـا الاُمرا
وناس تجري ورا الشُهرة
لكن من جوة أوي فاضيين

وشَنبات فِ الوشوش طالعة
وصلوات زيف يوم الجمعة
 دعوات خالية م الدمعة
تشوف أموات لكن صاحيين

وناس بتقول وما بتعملش
كلامهم كله هَتش ونتش
ومهما يقولوا ما تصدقش
ويِعلوا ويِفضلم واطيين

وناس ناجحين لكن بالغش
وسِيدهم وحدُه هو القِرش
وناس ع القهوة قاعدة تنِش
وعاملين نفسهم نايمين

دي ناس ليها ألف وِش ووِش
"آرايل".. واقفة جمب الدِش
وساعة القَرن لما يطِش
يتوبوا وهما مش راضيين !!